Yengil vazn toifasida harakat qiluvchi UFC jangchisi Dastin Porye (27-6) Konor Makgregorga (22-5) qarshi kechadigan uchinchi jangda ishtirok etish uchun chempionlik jangidan voz kechgan.
Bu haqda UFC prezidentining so‘zlariga tayanib, jurnalist Aron Bronsteter xabar qilmoqda. Uning so‘zlariga ko‘ra, UFC Poryega Habib Nurmagomedov faoliyatini yakunlaganidan keyin vakant bo‘lib qolgan yengil divizion chempionlik kamari uchun jang qilishni taklif qilgan. Biroq Porye ikki vazn toifasi sobiq chempioni Makgregorga qarshi jang qilish variantini tanlagan.
Makgregor va Porye o‘rtasidagi uchinchi jang 2021-yilning iyul oyida bo‘lib o‘tishi rejalashtirilmoqda. Yengil divizion kamari uchun esa Charlz Oliveyra va Maykl Chendler o‘zaro jang qiladi. Mazkur bahs 2021-yilning may oyida bo‘lib o‘tishi aytilmoqda.
Eslatib o‘tamiz, Porye yanvar oyida bo‘lib o‘tgan UFC 257 musobaqasida Makgregorni ikkinchi raundda nokautga uchratgandi. Undan avval yakkakurashchilar 2014-yilda ham o‘zaro to‘qnash kelgan va unda irlandiyalik sportchi birinchi raundda Poryeni nokautga uchratgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)