Rossiya prezidenti Vladimir Putin o‘zi haqida G‘arbning fikri qandayligidan tashvishlanib o‘tirmaydi. Bu haqda Kanada bosh vaziri Jastin Tryudo SiriusXM internet-radiostansiyasiga bergan intervyusida aytib o‘tdi, deb yozadi “RBK”.
“Putin G‘arbiy dunyo va Kanadaning u haqida qanday fikrda ekani bilan unchalik qiziqmaydi”, — dedi Tryudo.
Bosh vazirning so‘zlariga ko‘ra, u Putin bilan bir necha bor suhbat qurgan. Xalqaro forumlarda o‘tkazilgan uchrashuvlardan kelib chiqib, quyidagi fikrlarni bildirgan: “Putin yuzingizga qarab, istalgan daqiqada o‘ziga ma’qul gapni ayta oladi.
Tryudo, shuningdek, Putinning “ko‘plab dahshatli narsalar uchun javobgar” ekaniga ishonch bildirgan. Shu bilan birga Tryudo Putinga baho berishda AQSh prezidenti Jo Bayden kabi chuqurlashmasligini aytgan.
Avvalroq AQSh prezidenti Jo Bayden ABC telekanaliga bergan intervyusida jurnalistning “Rossiya prezidenti Vladimir Putinni qotil deb hisoblaysizmi?” — degan savoliga tasdiq javobini berdi. “Mmm, hmm, ha”, — deya javob qildi Bayden undan intervyu olayotgan Jorj Stefanopolusning savoliga.
Kreml esa Jo Baydenning Vladimir Putin haqidagi bayonotlarini “juda yomon” deb hisoblashini aytdi. Bu haqda Rossiya prezidentining matbuot kotibi Dmitriy Peskov jurnalistlarga bergan intervyusida aytib o‘tdi.
O‘z navbatida, Putin AQSh davlat rahbari Jo Baydenga to‘g‘ridan to‘g‘ri efir orqali muloqot qilishni taklif etdi. AQSh prezidenti Jo Bayden Rossiya prezidenti Vladimir Putin uni taklif qilgan ochiq muhokamaga rozilik berish-bermasligi haqidagi savolni e’tiborsiz qoldirdi.
Shuningdek, Turkiya prezidenti Rajab Toyyib Erdo‘g‘on amerikalik hamkasbi Jo Baydenning Rossiya yetakchisi Vladimir Putin haqidagi gaplarini qoralagan.
Izoh (0)