Qirg‘iziston Sog‘liqni saqlash vazirligi 29-martdan mamlakatda aholini koronavirus infeksiyasiga qarshi emlashning birinchi bosqichi boshlanishini ma’lum qildi. Vaksinatsiya Xitoyning Sinopharm preparati yordamida amalga oshiriladi, deb yozmoqda Kloop nashri.
Xabarga ko‘ra, har bir kishiga vaksina dozasi ikki marta, 25—28 kun oralig‘ida yuboriladi. Aholi ixtiyoriy ravishda emlanadi. Hammasi bo‘lib uch bosqichli vaksinatsiya amalga oshiriladi.
Birinchi bosqichda tibbiyot xodimlari, ta’lim muassasalari xodimlari, huquq-tartibot organlari xodimlari va xavfsizlik kuchlarini emlash rejalashtirilgan.
Ikkinchi bosqichda klinik xavf omillariga ega kishilar, surunkali kasalliklarga chalinganlar, aholining ijtimoiy zaif guruhlari, shuningdek, 60 yoshdan oshganlarga vaksina beriladi. Qolganlar faqat uchinchi bosqichda emlanadi.
Vaksinatsiyaning dastlabki bosqichi Bishkek, O‘sh va Chuy viloyatida boshlanadi. Bishkekda beshta, Chuy viloyatida va O‘shda ikkitadan emlash markazlari tashkil qilingan.
“Immunizatsiya bo‘yicha ilmiy-texnik ekspertlar kengashi (STGEI) tomonidan vaksinatsiyaga oid hujjatlarni tasdiqlash jarayoni ketmoqda. Respublikaning barcha mintaqalarida vaksinatsiyani tashkil etish yuzasidan tibbiyot xodimlari uchun o‘quv mashg‘ulotlari o‘tkazilmoqda”, — deyiladi vazirlik xabarida.
Sinopharm haqida ma’lumot
Qirg‘iziston 19-mart kuni COVID-19’ga qarshi Xitoyning Sinopharm vaksinasi partiyasini qabul qilib oldi. Umumiy hisobda, mamlakat 150 ming doza vaksinani bepul oldi.
Sinopharm vaksinasi — faollashtirilmagan (o‘ldirilgan) vaksina. Preparatni yaratishda patogen virus yoki bakteriya yoki bo‘lmasa ularga nihoyatda o‘xshash mikroorganizmlardan foydalaniladi, ular kimyoviy reagentlar, issiqlik yordamida o‘ldiriladi.
Sog‘liqni saqlash vazirligining ma’lumotlariga ko‘ra, Sinopharm preparati yordamida Xitoy, BAA, Turkiya, O‘zbekiston singari 65 mamlakatda 12 milliondan ortiq odam emlagan. Shuningdek, Sinopharm vaksinasi bilan emlashdan keyin hech qanday ikkilamchi ta’sirlar qayd etilmagan.
Ma’lumot uchun, Sinopharm vaksinasi Xitoyda 2020-yil dekabr oyida ro‘yxatdan o‘tkazildi va koronavirusga qarshi qo‘llash uchun tasdiqlangan birinchi Xitoy vaksinasiga aylandi. Preparatning samaradorligi 79 foiz ekani haqida xabar berilgan.
Izoh (0)