Путин учун Ғарбнинг у ҳақдаги фикри қизиқ эмас — Канада бош вазири

Россия президенти Владимир Путин ўзи ҳақида Ғарбнинг фикри қандайлигидан ташвишланиб ўтирмайди. Бу ҳақда Канада бош вазири Жастин Трюдо SiriusXM интернет-радиостанциясига берган интервьюсида айтиб ўтди, деб ёзади «РБК».

«Путин Ғарбий дунё ва Канаданинг у ҳақида қандай фикрда экани билан унчалик қизиқмайди», — деди Трюдо.

Бош вазирнинг сўзларига кўра, у Путин билан бир неча бор суҳбат қурган. Халқаро форумларда ўтказилган учрашувлардан келиб чиқиб, қуйидаги фикрларни билдирган: «Путин юзингизга қараб, исталган дақиқада ўзига маъқул гапни айта олади».

Трюдо, шунингдек, Путиннинг «кўплаб даҳшатли нарсалар учун жавобгар» эканига ишонч билдирган. Шу билан бирга Трюдо Путинга баҳо беришда АҚШ президенти Жо Байден каби чуқурлашмаслигини айтган.

Аввалроқ АҚШ президенти Жо Байден ABC телеканалига берган интервьюсида журналистнинг «Россия президенти Владимир Путинни қотил деб ҳисоблайсизми?» — деган саволига тасдиқ жавобини берди. «Ммм, ҳмм, ҳа», — дея жавоб қилди Байден ундан интервью олаётган Жорж Стефанополуснинг саволига.

Кремль эса Жо Байденнинг Владимир Путин ҳақидаги баёнотларини «жуда ёмон» деб ҳисоблашини айтди. Бу ҳақда Россия президентининг матбуот котиби Дмитрий Песков журналистларга берган интервьюсида айтиб ўтди.

Ўз навбатида, Путин АҚШ давлат раҳбари Жо Байденга тўғридан-тўғри эфир орқали мулоқот қилишни таклиф этди. АҚШ президенти Жо Байден Россия президенти Владимир Путин уни таклиф қилган очиқ муҳокамага розилик бериш-бермаслиги ҳақидаги саволни эътиборсиз қолдирди.

Шунингдек, Туркия президенти Ражаб Тоййиб Эрдўғон америкалик ҳамкасби Жо Байденнинг Россия етакчиси Владимир Путин ҳақидаги гапларини қоралаган.