Фарғонада ЙПХ инспекторига пора таклиф қилган ҳайдовчи қўлга олинди

Фарғона вилоятида ЙПХ инспекторига пора таклиф қилган шахс қўлга олинди. Бу ҳақда «Дарё»га вилоят ИИБ ахборот хизмати хабар берди.

Маълум қилинишича, 2021 йилнинг 15 март куни фуқаро С.Ў. Ўзбекистон тумани ИИБ ЙҲХБ инспектори А.Д.га мурожаат қилиб, ИЖ-412 русумли автомашинасини маст ҳолатда бошқарганлиги учун ўзига нисбатан расмийлаштирилган маъмурий баённомани судга юбормаслик ва ижобий ҳал қилиб бериш эвазига 100 доллар ва 500 минг сўм миқдоридаги пулларни пора тариқасида таклиф қилган.

Инспектор фуқарони пора бериш жиноят эканлиги ҳақида бир неча маротаба огоҳлантириб, бу йўлдан қайтаришга ҳаракат қилган бўлишига қарамай, фуқаро пора таклиф қилишда давом этган.

Шундан сўнг ЙПХ ходими мазкур ҳолат юзасидан ИИБ бошлиғи номига билдирги орқали мурожаат қилиб, фуқаро С.Ў.га нисбатан белгиланган тартибда чора кўрилишини сўраган.

Ҳолат юзасидан ИИВ ЎХБ Фарғона вилояти бўйича бўлими ҳамда Бош прокуратура ҳузуридаги иқтисодий жиноятларга қарши курашиш департаменти ва Ўзбекистон тумани ИИБ ходимлари билан ҳамкорликда ўтказилган тезкор тадбир давомида фуқаро С.Ў. 100 доллар ва 450 минг сўмни пора тариқасида ЙПХ ходимига берган вақтида ушланган. Пуллар холислар иштирокида далилий ашё тариқасида расмийлаштириб олинган.

Воқеа юзасидан тегишли тартибда процессуал ҳужжатлар расмийлаштирилиб, Ўзбекистон тумани Иқтисодий жиноятларга қарши курашиш департаментига юборилган.