Rossiya prokuraturasi 4 yoshli qizaloqni o‘ldirgan enagani qo‘lga olish vaqtidagi politsiya harakatlarini tekshiradi
Rossiya prokuraturasi 4 yoshli qizaloqni o‘ldirishda gumon qilinayotgan o‘zbekistonlik Gulchehra Boboqulovani qo‘lga olish chog‘idagi politsiya xodimlarining xatti-harakatlarini tekshiruvdan o‘tkazadi. Bu haqda, “Interfaks” agentligiga tayanib, Meduza xabar bermoqda.
“Politsiya xodimlarining xatti-harakatlari yuzasidan tegishli tuman prokuraturasi tekshiruv o‘tkazib, uning natijalariga ko‘ra huquq-tartibot organlari xodimlari harakatlarining tezkorligi va asosliligiga huquqiy baho beriladi”, – dedi Rossiya bosh prokurori birinchi o‘rinbosari Aleksandr Buksman.
Eslatib o‘tamiz, 29-fevral kuni Moskva shimoli-g‘arbidagi yong‘in yuz bergan xonadonda boshsiz qizning tanasi topildi. Oradan bir necha soat o‘tib “Oktyabrskoye pole” metro bekatida shu qizning enagasi, o‘zbekistonlik Gulchehra Boboqulova hibsga olingan. Xabar berishlaricha, uning qo‘lida qizchaning boshi bo‘lgan.
Guvohlarning so‘zlariga ko‘ra, o‘zini portlatib yuborish bilan tahdid qilgan ayolga qariyb 40 daqiqa davomida hech kim yaqinlashmagan. Keyinroq, “Interfaks” xabariga ko‘ra, ayol aybiga iqror bo‘lib, ko‘rsatma bergan.
