Тўрт яшар қизчани ўлдирган ўзбекистонлик энага мажбурий даволанишдан кейин Россиядан чиқариб юборилади

2017 йилнинг январида тўрт ёшли қизчани ўлдиргани учун судланган ўзбекистонлик собиқ энага Гулчеҳра Бобоқулова мажбурий даволаниш муддати тугаганидан кейин Россиядан чиқариб юборилади, деб ёзади Meduza Россия Ички ишлар вазирлигига таяниб.

ИИВ маълум қилишича, 2017 йилда Бобоқулованинг Россияда бўлиб туриши номақбул деб топилган. «Даволаниб бўлганидан кейин у Россиядан ташқарига депортация қилинади», — дейилади ИИВ хабарида. Аммо собиқ энаганинг даво муолажалари қачон якунланишига аниқлик киритилмаган.

Февраль ойида «Московский комсомолец» нашри Бобоқулова Татаристоннинг Қозон шаҳридаги руҳий шифохонада эканини маълум қилганди (бундай маълумотлар расман маълум қилинмайди). Аёлнинг онаси айтишича, шифокорлар Бобоқулованинг аҳволини барқарор деб баҳолаган ва тегишли ҳужжатлар келиб тушгач, уни депортация қилишга тайёрлигини билдирган.

Бобоқулова томонидан ўлдирилган қизчанинг онаси Евгения Мешчерякова эса собиқ энага даволаниб чиққанидан кейин оиладан ўч олиши мумкинлигидан хавотирланганди.

2016 йилнинг 29 февраль куни Москвада Гулчеҳра Бобоқулова ўзи қараб туриши керак бўлган тўрт ёшли қизчани бўғиб ўлдирган ва бошини танасидан жудо қилган. Сўнг хонадонга ўт қўйиб, кўчага чиқиб кетган. У қўлида қизчанинг бошини кўтарган ҳолда 20 дақиқача кўчаларни кезиб юрган. «Октябрьское поле» метро бекатига бориб, портлатиб юбориш билан таҳдид қилган. Судда терговчилар тақдим этган экспертиза натижаларига кўра, Бобоқулова шуурсизлик ҳолатида (нима қилаётганини ўзи билмайдиган ҳолатда) бўлиб, бунгача Ўзбекистонда шизофрения касаллигидан даволанган.