Qirg‘izistonning Norin viloyati delegatsiyasi Navro‘z bayrami arafasida Farg‘ona viloyatida bo‘ldi. Bu haqda “Daryo” muxbiri Azizjon Ermatov xabar berdi.
Ta’kidlanishicha, Farg‘ona viloyati hokimligining “Qabullar uyi”da viloyat hokimi Xayrullo Bozorov va Norin viloyati gubernatori Sobirqul Ashimbayev boshchiligida delegatsiyalarning kengaytirilgan uchrashuvi o‘tkazilgan. Uchrashuvda logistika, qishloq xo‘jaligi, sanoat, turizm, qurilish, savdo-sotiq sohalarida hamkorlik o‘rnatish, o‘zaro savdo aylanmasini sezilarli oshirish, shuningdek, ijtimoiy sohada aloqalarni kengaytirish masalalari muhokama qilingan.
Uchrashuvdan so‘ng “Qabullar uyi” hududida ikki viloyat rahbarlari ishtirokida qirg‘iz o‘tovi o‘rnatilgan. O‘tovda mehmonlar delegatsiyasi safida tashrif buyurgan taniqli san’atkor Askat Musabekov qirg‘iz xalq qo‘shiqlarini ijro etgan.
Shundan so‘ng Norin viloyati delegatsiyasi Farg‘ona, Toshloq, Quva, Oltiariq va Rishton tumanlari hamda Marg‘ilon va Quvasoy shaharlarida yangi sanoat korxonalari, milliy hunarmandchilik, qishloq xo‘jaligi tarmoqlarida olib borilayotgan ishlar bilan yaqindan tanishgan.
Qayd etilishicha, “Bahodir Log‘on” klasteri hamda Norin viloyatining Atbashi tumani o‘rtasida ushbu tuman hududida kartoshka yetishtirish hamda chorvachilikni rivojlantirish bo‘yicha hamkorlik yo‘lga qo‘yilgan. Atbashida yetishtiriladigan kartoshkani O‘zbekistonga eksport qilish ko‘zda tutilgan. Hamkorlik doirasida klaster tomonidan Atbashi tumani aholisi hamda fermerlar shartnoma asosida texnika, mineral o‘g‘it, urug‘lik kartoshka, maosh bilan ta’minlanadi. Ushbu kelishuv asosida Norin viloyatiga “Bahodir Log‘on” klasteriga qarashli o‘nta traktor jo‘natilgan.
Tashrifning ikkinchi kunida Farg‘ona shahrida Farg‘ona va Norin viloyatlari ishbilarmon doiralari vakillari ishtirokida biznes-forum bo‘lib o‘tgan.
Biznes-forum davomida Marg‘ilon va Norin shaharlari, Quvasoy shahri va Ak-talaa tumani, Toshloq va Jumgal, Quva va Norin, Oltiariq va Qochkor tumanlari o‘rtasida savdo-iqtisodiy hamda investitsion sohalarda o‘zaro hamkorlikni yo‘lga qo‘yish yuzasidan memorandum imzolangan. “Bahodir Log‘on” klasteri hamda Atbashi tumanlari o‘rtasida esa qishloq xo‘jaligi va chorvachilik sohasida ko‘p tomonlama hamkorlikni ko‘zda tutgan shartnoma tuzildi.
Ma’lum qilinishicha, ayni paytda viloyatda Qirg‘iziston sarmoyasi ishtirokida 30 ta qo‘shma korxona faoliyati yo‘lga qo‘yilgan. 2020-yilda Farg‘ona viloyati va Qirg‘iziston o‘rtasida import-eksport hajmi qariyb 160 million AQSh dollarini tashkil etgan. Hozirda viloyatda qirg‘izistonlik tadbirkorlar tomonidan tekstil, qishloq xo‘jaligi va qurilish materiallari ishlab chiqarish yo‘nalishida 36,6 million dollar qiymatidagi 6 ta yangi loyiha amalga oshirilmoqda.
Izoh (0)