Qashqadaryo viloyatining Qarshi shahrida Mudofaa vazirligi harbiy xizmatchilariga besh qavatli, 30 xonadonli yangi uy kalitlari topshirildi, deya xabar berdi “Daryo” muxbiri.
Ma’lum bo‘lishicha, 2021-yil 19-mart kuni viloyatda bo‘lib o‘tgan Navro‘z tantanalari davomida hokim Zoir Mirzayev bir guruh san’atkorlar bilan birga harbiy xizmatchilarga yangi xonadon kalitlarini topshirgan.
“Qarshi shahrining ‘Roguzar’ mahallasidagi mazkur besh qavatli 30 xonadonli uy Mudofaa vazirligining harbiy xizmatlari uchun barpo etilgan bo‘lib, uyning umumiy qiymati 4 milliard 944 million so‘mni tashkil qiladi. Mazkur uy harbiy xizmatchilarga imtiyozli tarzda berildi”, — deydi “Qishloqqurilishinvest” MChJ injiniring kompaniyasining viloyat filiali direktori Qo‘yli Narzullayev.
Qo‘yli Narzullayevning ma’lumot berishicha, “Qishloqqurilishinvest” MChJ injiniring kompaniyasi buyurtmasi asosida viloyatda 2009—2020-yillar davomida namunaviy loyiha asosida 15 798 ta uy-joy barpo etilgan bo‘lib, aholiga imtiyozli tarzda yetkazib berilgan.
“22 yildan beri Toshkent harbiy okrugiga qarashli harbiy qismlarda xizmat qilib kelaman. Navro‘z bayrami arafasida arzimas xizmatimni inobatga olib, Qarshi shahridan zamonaviy xonadon kalitini topshirishdi. Bundan men va oilam juda xursandmiz”, — deydi harbiy xizmatchi Sirojiddin Xolmirzayev.
Ta’kidlanishicha, 2017—2020-yillarda viloyatda “Qishloqqurilishinvest” MChJ injiniring kompaniyasi buyurtmasi asosida rahbar xodimlar uchun 175 ta, Mudofaa vazirligi harbiy xizmatchilariga 264 ta, FVV harbiylariga 30 ta, Milliy gvardiya xodimlariga 75 ta, IIB xodimlariga 135 ta, DXX harbiylari uchun 210 ta, yosh oilalar uchun 150 ta, og‘ir ijtimoiy ahvolga tushib qolgan ayollar uchun 264 ta, profilaktika inspektorlari uchun 568 ta turar joy qurilib, foydalanishga topshirilgan.
Mavzuga doir:
Izoh (0)