Қирғизистоннинг Норин вилояти делегацияси Наврўз байрами арафасида Фарғона вилоятида бўлди. Бу ҳақда «Дарё» мухбири Азизжон Эрматов хабар берди.
Таъкидланишича, Фарғона вилояти ҳокимлигининг «Қабуллар уйи»да вилоят ҳокими Хайрулло Бозоров ва Норин вилояти губернатори Собирқул Ашимбаев бошчилигида делегацияларнинг кенгайтирилган учрашуви ўтказилган. Учрашувда логистика, қишлоқ хўжалиги, саноат, туризм, қурилиш, савдо-сотиқ соҳаларида ҳамкорлик ўрнатиш, ўзаро савдо айланмасини сезиларли ошириш, шунингдек, ижтимоий соҳада алоқаларни кенгайтириш масалалари муҳокама қилинган.
Учрашувдан сўнг «Қабуллар уйи» ҳудудида икки вилоят раҳбарлари иштирокида қирғиз ўтови ўрнатилган. Ўтовда меҳмонлар делегацияси сафида ташриф буюрган таниқли санъаткор Аскат Мусабеков қирғиз халқ қўшиқларини ижро этган.
Шундан сўнг Норин вилояти делегацияси Фарғона, Тошлоқ, Қува, Олтиариқ ва Риштон туманлари ҳамда Марғилон ва Қувасой шаҳарларида янги саноат корхоналари, миллий ҳунармандчилик, қишлоқ хўжалиги тармоқларида олиб борилаётган ишлар билан яқиндан танишган.
Қайд этилишича, «Баҳодир Лоғон» кластери ҳамда Норин вилоятининг Атбаши тумани ўртасида ушбу туман ҳудудида картошка етиштириш ҳамда чорвачиликни ривожлантириш бўйича ҳамкорлик йўлга қўйилган. Атбашида етиштириладиган картошкани Ўзбекистонга экспорт қилиш кўзда тутилган. Ҳамкорлик доирасида кластер томонидан Атбаши тумани аҳолиси ҳамда фермерлар шартнома асосида техника, минерал ўғит, уруғлик картошка, маош билан таъминланади. Ушбу келишув асосида Норин вилоятига «Баҳодир Лоғон» кластерига қарашли ўнта трактор жўнатилган.
Ташрифнинг иккинчи кунида Фарғона шаҳрида Фарғона ва Норин вилоятлари ишбилармон доиралари вакиллари иштирокида бизнес-форум бўлиб ўтган.
Бизнес-форум давомида Марғилон ва Норин шаҳарлари, Қувасой шаҳри ва Ак-талаа тумани, Тошлоқ ва Жумгал, Қува ва Норин, Олтиариқ ва Қочкор туманлари ўртасида савдо-иқтисодий ҳамда инвестицион соҳаларда ўзаро ҳамкорликни йўлга қўйиш юзасидан меморандум имзоланган. «Баҳодир Лоғон» кластери ҳамда Атбаши туманлари ўртасида эса қишлоқ хўжалиги ва чорвачилик соҳасида кўп томонлама ҳамкорликни кўзда тутган шартнома тузилди.
Маълум қилинишича, айни пайтда вилоятда Қирғизистон сармояси иштирокида 30 та қўшма корхона фаолияти йўлга қўйилган. 2020 йилда Фарғона вилояти ва Қирғизистон ўртасида импорт-экспорт ҳажми қарийб 160 миллион АҚШ долларини ташкил этган. Ҳозирда вилоятда қирғизистонлик тадбиркорлар томонидан текстиль, қишлоқ хўжалиги ва қурилиш материаллари ишлаб чиқариш йўналишида 36,6 миллион доллар қийматидаги 6 та янги лойиҳа амалга оширилмоқда.
Изоҳ (0)