Prezident Shavkat Mirziyoyev 19-mart kuni xalq deputatlari Toshkent viloyati kengashining navbatdan tashqari sessiyasida hududning irrigatsiya tizimi, bu yo‘nalishda hokimlarning faoliyati hamda Chorvoq suv ombori resurslarini tejash zarurligiga to‘xtalib o‘tdi, deya xabar bermoqda “Gazeta.uz”.
“Toshkent viloyati — bu Surxondaryo viloyati emas, Qashqadaryo viloyati emas. Bu Toshkent viloyati. Men kecha topshiriq berdim: klasterlar hokimiyat bilan shartnoma qiladi. Shartnoma shundan iborat bo‘ladiki, klasterning ertangi rivojlanishi, hisob-kitobi, rejalari chuqur qayta ko‘rib chiqiladi. Paxtani qayta ishlab chiqarish va boshqalar innovatsion investitsiya olib kelishga asos bo‘ladi. Mana shuni ham hammalaring bilib olishlaring kerak”, — dedi davlat rahbari.
Prezidentning ta’kidlashicha, Bo‘ka, Bekobod, Yuqori Chirchiq, Ohangaron tumanlarida “yerga qarab bo‘lmaydi”, zovurlari qazilmagan, mavjudlari ham to‘lib qolgan.
“Bu yerda hokim bo‘lib ishlagan oqsoqollar o‘tiribdi. O‘zi yerni kim zaharlaydi? Suv zaharlaydi. Mana men 1 milliard kub metrga yaqin suvni iqtisod qilish bo‘yicha topshiriq berdim. Endi Chorvoqda suvni ochishmaydi. O‘zini eng katta agronom deb hisoblaydigan hokimlar endi suvni ochishni so‘raydi. Lekin buning uchun hisob-kitob qilish kerak”, — dedi Shavkat Mirziyoyev.
U Chinoz tumanida qariyb 1000 gektar yerni o‘zlashtirgan va o‘zi texnika olib kelgan tadbirkor haqida so‘zlab berdi. Tashrif arafasida Prezident Yangioboddagi jami 202 ming kub metr sig‘imga ega 3 ta suv havzasi barpo etilgan va ekinlarni tomchilatib sug‘orish yo‘lga qo‘yilgan ekin maydonlarini borib ko‘rgan edi.
“Borib ko‘rib kelinglar. Tadbirkor davlatdan yordam olmagan, biz ham yordam berganimiz yo‘q. 1,5 million dollar kredit olib, texnika keltirgan. ‘Shavkat Miromonovich, janob Prezident, agar siz menga salgina yordam bersangiz, bu yilning o‘zida 50 sentner [paxta] olaman’, deyapti. Ekilmagan, suv yo‘q joydan. A nimaga siz, ‘mardlik qilmagan’ janob hokimlar borib ko‘rib kelmaysiz? Yoqmaydi-da sizlarga?! Sizlarga faqat Chorvoqni ochib bersa. Kanal suvga to‘lsa, keyin 24 soat suv oqadi. Siz hattoki ikki soat ham suvni nazorat qilmaysiz”, — deb qo‘shimcha qildi u.
Prezident raisligida o‘tgan yig‘ilishda 2021-yilgi sug‘orish mavsumida suv ta’minoti 25 foiz kam bo‘lishi kutilayotgani aytilgan. Shu bois, 430 ming gektarda suv tejovchi texnologiyalarni joriy qilish orqali 3 milliard kubometr suvni tejash lozimligi ta’kidlandi.
Bundan avval Shavkat Mirziyoyev Nurafshon shahrida amalga oshirilayotgan loyihalar bilan tanishgani, Chirchiq shahar “to‘rtligi”ni nega ishdan olmaganini aytgani hamda Toshkent viloyati ikkiga bo‘linishi mumkinligini ma’lum qilgani haqida xabar berilgandi.
Izoh (0)