Qashqadaryo viloyati Qarshi tumanida 2021-yil 6-mart kuni erkak xotiniga achchiq qilib, uyini portlatib yubordi. Bu haqda “Zamon” informatsion dasturida xabar qilindi.
Ma’lum qilinishicha, holat tumanning “Shirkent” mahallasida sodir bo‘lgan. Voqea sodir bo‘lgan kuni R.R. ismli erkak turmush o‘rtog‘i X.N. bilan janjallashib qolgan. Shundan so‘ng ayol mahalla inspektoriga telefon qilib, eri oila a’zolarining hammasini o‘ldirish bilan tahdid qilganini aytib, yordam so‘ragan. Ushbu holat yuzasidan voqea joyiga mahalla kotibi va noziri yetib borganida erkak ularni ko‘rganida yanada jazavaga tushib, uy ichkarisiga kirib ketgan.
Shu payt ular ayol va qizini uydan olib chiqib ketgan. Erkakni tinchlantirish uchun uyga qaytib kirganida, gaz ballonini ochib, portlatib yuborgan.
Oqibatda mahalla kotibi va noziri tan jarohati olib, shifoxonaga yetkazilgan. Shuningdek, uyning oshxona va yotoqxona qismi qulab tushgan.
“Jahlim chiqib turgan edi. O‘zimni ko‘rsatmoqchi bo‘ldimmi, bilmayman. Qilgan ishimdan pushaymonman”, — deydi erkak.
Hozirda tuman prokuraturasi tomonidan surishtiruv ishlari olib borilmoqda.
Bundan avval Navoiyda xotiniga pichoq o‘qtalib, uni qo‘rqitib qo‘ymoqchi bo‘lgan fuqaroga nisbatan jinoyat ishi qo‘zg‘atilgani, xotinini o‘ldirib, ko‘mib qo‘ygani uchun qamalib chiqqan shaxs uylanish va’dasida turmagani uchun Bo‘stonliqda beton bo‘lagiga bog‘langan holda kanalga tashlab yuborilgani hamda Samarqandda er arazlab ketib qolgan xotinini 31 marta pichoq urib o‘ldirgani haqida xabar berilgandi.
Izoh (0)