Фарғонада ички ишлар органларига ишга киритиб қўйиш учун аёлдан 2 минг доллар талаб қилганлар қўлга олинди

Фарғона вилоятида аёл кишини ички ишлар органларига ишга киритиб қўйишни ваъда қилиб, ундан пул сўраган шахслар ушланди, дея хабар бермоқда ЎзА.

Қайд этилишича, фуқаро Ш.Л. (аёл) Фарғона вилояти ички ишлар бошқармасига мурожаат қилиб, унда фуқаро Х.Ш, Б.У. исмли танишлари 2000 АҚШ доллари эвазига ички ишлар органларига ишга киритиб қўйиши мумкинлигини айтиб, олдиндан 300 АҚШ доллари миқдоридаги пулларни талаб қилаётганини маълум қилган ва фуқаро Х.Ш.га қонуний чора кўришни сўраган.

Ҳолат юзасидан ИИВ Ўз хавфсизлиги бошқармаси Фарғона вилояти бўйича бўлими ходимлари томонидан ўтказилган тезкор тадбир давомида Х.Ш. Ш.Л.дан Фарғона шаҳри ҳудудида келишилган пуллардан 200 АҚШ доллари миқдоридаги пулни пора тариқасида олаётган вақтида тадбир иштирокчилари томонидан ушланган. Ушбу пуллар холислар иштирокида далилий ашё тариқасида расмийлаштириб олинди.

Мазкур ҳолат юзасидан тегишли тартибда процессуал ҳужжатлар расмийлаштирилиб, Фарғона вилояти ИИБ ҳузуридаги Тергов бошқармасига юборилди.

Бундан аввал «Тошкент шаҳар сув таъминоти» директори ўринбосари 3 миллион сўм пора олаётганда қўлга олингани, Навоийда тадбиркорга тегишли ерни 150 минг долларга сотишга уринган шахс ушлангани ҳамда Самарқандда фуқарони «аёллар дафтари»га киритиш учун 500 доллар талаб қилган маҳалла раисига жиноят иши қўзғатилгани ҳақида хабар берилганди.