Бош прокуратура ходимининг Олий суд ходимлари билан тил бириктириб, фуқароларнинг мурожаатларини бизнесга айлантиргани ва бошқа ҳолатлар ҳақида хабар тарқалди. Бош прокуратура мазкур хабар юзасидан баёнот берди.
Аниқланишича, хабар Д.Х. томонидан тарқатилган. Аввалроқ Д.Х.нинг ўзига нисбатан бўлган маъмурий иш бўйича чиқарилган суд қарорларидан норози бўлиб йўллаган мурожаатлари Бош прокуратурада кўриб чиқилган. Иш ҳужжатларига асосан, Д.Х. 2018 йил 12 октябрь Nexia’ни ҳайдаб кетаётиб, бошқарувни йўқотган. Натижада йўлнинг қарама-қарши тарафига ўтиб кетиб, Ж.С. бошқарувидаги Nexia билан тўқнашув содир этган. Д.Х.нинг орқасидан ҳаракатланиб келаётган Matiz ҳайдовчиси С.Р. унинг Nexia’си орқа қисмига урилган.
Ҳолат юзасидан Урганч туман маъмурий судининг 2019 йил 11 октябрдаги қарори билан Д.Х. Маъмурий жавобгарлик тўғрисидаги кодекснинг 133-моддаси (транспорт воситалари ҳайдовчиларининг йўл ҳаракати қоидаларини бузиши жабрланувчига енгил тан жароҳати ёки анча миқдорда моддий зарар етказилишига олиб келиши), С.Р. мазкур кодекснинг 134-моддаси (ҳайдовчиларнинг йўл ҳаракати қоидаларини бузиши транспорт воситаларининг ёки бошқа мол-мулкнинг шикастланишига олиб келиши) ва 135-моддаси (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) 2-қисми билан айбдор деб топилиб, уларга нисбатан энг кам иш ҳақининг 3 баравари миқдорида, яъни 552 минг сўмдан жарима тайинланган.
Шу билан бирга, ушбу қарорда Д.Х.дан Ж.С.нинг фойдасига автотранспорт воситасига етказилган зарар учун 1 миллион 778 минг сўм, С.Р.дан Д.Х.нинг фойдасига 264 минг сўм моддий зарар ундириш кўрсатилган. Хоразм вилоят маъмурий суди кассация инстанциясининг 2020 йил 16 январдаги қарори билан биринчи инстанция суди қарори ўзгартирилиб, Д.Х.га нисбатан тайинланган жарима жазоси энг кам иш ҳақининг 1 баравари миқдорида, яъни 184 300 сўм этиб белгиланган. Судда Д.Х.нинг содир қилган ҳуқуқбузарлиги ишда тўпланган тушунтириш хатлари, йўл-транспорт ҳодисаси чизмаси, фотосуратлар ҳамда бошқа далиллар билан ўз тасдиғини топган.
Хоразм вилоят прокуратураси томонидан ҳуқуқбузар Д.Х.нинг айблилик масаласи далиллар билан тўлиқ тасдиқланмагани асос қилиниб, ишнинг унга оид қисмини тугатиш ҳақида Олий судга назорат тартибида протест келтириш масаласини кўриб чиқиш бўйича Бош прокуратурага тақдимнома киритилган. Бироқ тақдимномада келтирилган важлар иш ҳужжатларида ўз тасдиғини топмагани боис тақдимнома қувватланмасдан қайтарилган.
Бундан ташқари, Бош прокуратура томонидан унинг мурожаати асосида ушбу маъмурий иш қайта ўрганиб чиқилиб, Олий суд маъмурий ишлар бўйича судлов ҳайъатига протест келтириш учун асослар аниқланмаган.
Изоҳ (0)