OpenSignal tahliliy agentligi zamonaviy flagmanlardagi mobil aloqa sifatini o‘rgandi. Buning uchun ular AQSh hududida 5G va 4G tarmoqlardagi smartfonlarning o‘rtacha internet tezligini sinovdan o‘tkazgan, deb xabar beradi Hi-Tech.Mail.ru.
Umumiy hisobda brendlar taqqoslansa, 5G orqali yuklab olish tezligi bo‘yicha Samsung yetakchilik qilmoqda — mazkur brend smartfonlar o‘rtacha 54 megabit/soniyani taqdim etmoqda. Kichik farq bilan OnePlus va Google smartfonlari keyingi pog‘onada joylashgan bo‘lsa, ulardan keyin LG o‘rin olgan. Apple kompaniyasining smartfonlari esa eng oxirgi o‘rinda. iPhone 12 flagmanlari o‘rtacha 44,5 megabit/soniya tezligida ishlaydi.
Agarda modellar alohida olinadigan bo‘lsa, iPhone 12 hatto mobil internet eng tez bo‘lgan 25 ta smartfondan iborat ro‘yxatdan ham o‘rin olmagan.
Apple o‘zining 5G-smartfonlari raqiblaridan keyin taqdim etgan, mish-mishlarga ko‘ra, bunga Intel tomonidan modemlarni yaratish muammosi sabab bo‘lgan. iPhone 12’ga Qualcomm chiplari o‘rnatilgan, biroq bunga qadar kompaniya Intel’dan modemlar ishlab chiqarish va kollektiv mutaxassislarni xarid qilgan. Shunday ekan, qurilmalarning keyingi avlodida Apple o‘z yechimini taqdim etishi mumkin.
Avvalroq AnTuTu benchmarki 2021-yilning fevral oyi yakunlari bo‘yicha eng kuchli Android smartfonlar reytingni e’lon qilgandi. So‘nggi uch oy ichida Snapdragon 888 protsessorida ishlaydigan dastlabki smartfonlar chiqqan, shu sababli ro‘yxat o‘tgan yilning oxiridagi reytingdan ancha farq qiladi.
Izoh (0)