Shuhrat Abdurahmonov: “Qirg‘iziston hududida tadbirkorlarimiz tomonidan ishlab chiqarish binolarini qurish, ishchi o‘rinlari yaratish masalalarini ham muhokama qildik”

Andijon viloyati 2020-yilda Qirg‘iziston bilan 270 million dollarlik mahsulot ayriboshlagan. Bu haqda Andijon viloyati hokimi Shuhrat Abdurahmonov Qirg‘iziston prezidenti Sadir Japarov tashrifi munosabati bilan 12-mart kuni Toshkent shahridagi texnoparkda tashkil etilgan ko‘rgazmada jurnalistlarga bergan intervyusida ta’kidlab o‘tdi, deya xabar qilmoqda “Daryo” muxbiri.

“Tashrifning birinchi kuni viloyatlarimiz o‘rtasidagi muammoli masalalarning hammasini muhokama qilib, kelishuvga erishdik. Bugungi ikkinchi kunda esa asosiy masala — savdo-iqtisodiy aloqalarimizni rivojlantirishga qattiqroq urg‘u beryapmiz. Nafaqat bizning mahsulotlarni Qirg‘izistonga olib chiqib sotish, balki qo‘shni mamlakat hududida tadbirkorlarimiz tomonidan ishlab chiqarish (obyekt)larni qurish, ishchi o‘rinlari yaratish masalalarini ham muhokama qildik.

Umuman aytganda, andijonlik tadbirkorlar Qirg‘izistonga investitsiya olib kirishi, qirg‘izistonlik ishbilarmonlar esa O‘zbekistonga investitsiya olib kirish masalasi bo‘yicha juda katta savdo shartnomalari tuzdik. Xususan, 60 million dollardan ortiq eksport shartnomasi, 10 million dollardan ziyod investitsiya kiritish bo‘yicha shartnomalar imzolandi. Bu yana davom etyapti.

Mazkur tashrif va uchrashuv ikki mamlakat o‘rtasidagi savdo-iqtisodiy aloqalarni, ikkita xalqning farovonligini ta’minlashga katta xizmat qiladi, deb o‘ylayman”, — dedi viloyat rahbari.

Uning aytishicha, madaniyat va san’at sohalaridagi hamkorlikni ham rivojlantirish rejalashtirilgan.

“Jalolobod va O‘sh viloyatlarining ko‘p aholisi o‘zbek millatiga mansub fuqarolar hisoblanadi. Shu bois ham nafaqat savdo-iqtisodiy, balki madaniyat, san’at, sport yo‘nalishlarida ham bordi-keldi qilish, qolaversa, ‘Andijon kunlari O‘sh—Jalolobodda’, ‘O‘sh—Jalolobod kunlari Andijonda’ kabi yangi tizimlarni ham kelishib, ‘yo‘l xaritasi’ga kiritdik. O‘ylaymanki, bularning ijrosini ta’minlasak, madaniyatimizni ham, tariximizni ham birligini isboti bo‘ladi”, — dedi u.

Abdurahmonovning qo‘shimcha qilishicha, Andijon viloyati Qirg‘izistonga 2020-yilda 2019-yilga nisbatan 1,2 barobar ko‘p mahsulot ayriboshlagan.

“Andijon viloyatining o‘zi 2020-yilda Qirg‘iziston bilan 270 million dollarlik mahsulot ayriboshlagan. Pandemiyaga qaramay, bu ko‘rsatkich 2019-yilga nisbatan 1,2 barobar ko‘p. Davlatimiz rahbari ushbu raqamni ikki barobar oshirish zarurligini ta’kidladi. Buning uchun barcha imkoniyatlarimiz bor”, — dedi Shuhrat Abdurahmonov.