Germaniya Iqtisodiyot instituti (IW) butun pandemiya davrida mamlakatning yalpi ichki mahsuloti (YaIM) hajmi qisqarishini, taxminan, 250 milliard yevroga baholadi. Bu haqda institut direktori Mixael Gyuterga tayanib, “Korrespondent.net” xabar berdi.
Mutaxassislarning hisob-kitoblariga ko‘ra, 2021-yilning birinchi choragida lokdaun Germaniya iqtisodiyotiga, taxminan, 50 milliard yevroga tushadi.
Gyuterning ta’kidlashicha, koronavirusning tarqalishi natijasida yuzaga kelgan inqiroz Germaniya iqtisodiyoti uchun misli ko‘rilmagan zarba bo‘ldi. Davlat tomonidan moliyaviy yordam va ko‘pincha ishdan bo‘shatishning oldini oluvchi qisqartirilgan ish soatlari dasturi salbiy oqibatlarning oldini olishga yordam berdi. Lekin to‘lovlar vaqti-vaqti bilan sezilarli kechikishlar bilan amalga oshirildi.
Gyuterning so‘zlariga ko‘ra, ayni paytda Germaniyada besh mingga yaqin “zombi-korxonalar” bor bo‘lib, ular faqat davlatning moliyaviy yordami tufayli yoki to‘lovga layoqatsiz kompaniyalar tomonidan bankrotlik e’lon qilish majburiyati vaqtincha bekor qilingani sababligina mavjud bo‘lib qolmoqda.
Shunga qaramay, Germaniyada 2020-yil davomida, taxminan, 16 300 ta korxona bankrotlik e’lon qildi, deb ma’lumot berdi Gyuter.
Ikkinchi tomondan, pandemiya davrida Germaniyadagi ko‘plab korxonalar ancha-muncha mablag‘larni tejashga muvaffaq bo‘lgan, masalan, chet elga va mamlakat ichidagi xizmat safarlari sonini kamaytirish orqali.
Germaniya Tadbirkorlik turizmi birlashmasining hisob-kitoblariga ko‘ra, pandemiya boshlanganidan buyon kompaniyalar xizmat safarlarining bekor qilinishi sababli 50 milliard yevroni tejab qoldi. Xizmat safarlari soni deyarli 90 foizga qisqardi.
Ma’lumot uchun, Germaniyada 22-fevraldan boshlab boshlang‘ich maktablar ochildi, o‘quvchilar navbatma-navbat guruhlarga bo‘linib o‘qitilmoqda. Qoidalar mintaqalarga qarab farq qiladi. Masalan, Berlinda o‘quvchilar 22-fevraldan darslarga qatnashi mumkin, lekin bu ular uchun majburiy emas, mashg‘ulotlarda onlayn tarzda ishtirok etish ham mumkin. Maktabga kelib, ta’lim olishni istaganlar tibbiy niqob taqishi va 1,5 metrlik ijtimoiy masofaga amal qilishi lozim. 4-sinfdan 6-sinfgacha bo‘lgan o‘quvchilar uchun 9-martdan o‘quv jarayonlari boshlandi. 10—13-sinf o‘quvchilari 17-martdan boshlab darslarga qatnashi mumkin bo‘ladi. Avvalroq Germaniyada karantin muddati 28-martgacha uzaytirilgan edi.
Avvalroq Germaniyada mart oyining oxiridan boshlab vaksinatsiya nafaqat maxsus emlash markazlarida, balki xususiy tibbiy klinikalarida amalga oshirilishi haqida xabar berildi. Ta’kidlanishicha, Germaniya hukumati aholini tezroq emlash uchun shunday qarorga keldi.
Izoh (0)