Германия Иқтисодиёт институти (IW) бутун пандемия даврида мамлакатнинг ялпи ички маҳсулоти (ЯИМ) ҳажми қисқаришини, тахминан, 250 миллиард еврога баҳолади. Бу ҳақда институт директори Михаэль Гютерга таяниб, «Korrespondent.net» хабар берди.
Мутахассисларнинг ҳисоб-китобларига кўра, 2021 йилнинг биринчи чорагида локдаун Германия иқтисодиётига, тахминан, 50 миллиард еврога тушади.
Гютернинг таъкидлашича, коронавируснинг тарқалиши натижасида юзага келган инқироз Германия иқтисодиёти учун мисли кўрилмаган зарба бўлди. Давлат томонидан молиявий ёрдам ва кўпинча ишдан бўшатишнинг олдини олувчи қисқартирилган иш соатлари дастури салбий оқибатларнинг олдини олишга ёрдам берди. Лекин тўловлар вақти-вақти билан сезиларли кечикишлар билан амалга оширилди.
Гютернинг сўзларига кўра, айни пайтда Германияда беш мингга яқин «зомби-корхоналар» бор бўлиб, улар фақат давлатнинг молиявий ёрдами туфайли ёки тўловга лаёқатсиз компаниялар томонидан банкротлик эълон қилиш мажбурияти вақтинча бекор қилингани сабаблигина мавжуд бўлиб қолмоқда.
Шунга қарамай, Германияда 2020 йил давомида, тахминан, 16 300 та корхона банкротлик эълон қилди, деб маълумот берди Гютер.
Иккинчи томондан, пандемия даврида Германиядаги кўплаб корхоналар анча-мунча маблағларни тежашга муваффақ бўлган, масалан, чет элга ва мамлакат ичидаги хизмат сафарлари сонини камайтириш орқали.
Германия Тадбиркорлик туризми бирлашмасининг ҳисоб-китобларига кўра, пандемия бошланганидан буён компаниялар хизмат сафарларининг бекор қилиниши сабабли 50 миллиард еврони тежаб қолди. Хизмат сафарлари сони деярли 90 фоизга қисқарди.
Маълумот учун, Германияда 22 февралдан бошлаб бошланғич мактаблар очилди, ўқувчилар навбатма-навбат гуруҳларга бўлиниб ўқитилмоқда. Қоидалар минтақаларга қараб фарқ қилади. Масалан, Берлинда ўқувчилар 22 февралдан дарсларга қатнаши мумкин, лекин бу улар учун мажбурий эмас, машғулотларда онлайн тарзда иштирок этиш ҳам мумкин. Мактабга келиб, таълим олишни истаганлар тиббий ниқоб тақиши ва 1,5 метрлик ижтимоий масофага амал қилиши лозим. 4-синфдан 6-синфгача бўлган ўқувчилар учун 9 мартдан ўқув жараёнлари бошланди. 10—13-синф ўқувчилари 17 мартдан бошлаб дарсларга қатнаши мумкин бўлади. Аввалроқ Германияда карантин муддати 28 мартгача узайтирилган эди.
Аввалроқ Германияда март ойининг охиридан бошлаб вакцинация нафақат махсус эмлаш марказларида, балки хусусий тиббий клиникаларида амалга оширилиши ҳақида хабар берилди. Таъкидланишича, Германия ҳукумати аҳолини тезроқ эмлаш учун шундай қарорга келди.
Изоҳ (0)