AstraZeneca вакцинаси атрофидаги шов-шув давом этмоқда, Париж касалхоналарида жой қолмади, Молдовада фавқулодда ҳолат эълон қилинади. Коронахабарлар

Сўнгги бир кеча-кундузда юз берган коронавирус билан боғлиқ энг муҳим хабарлар — «Дарё» коронадайжестида.

Нидерландия ҳукумати икки ҳафтага, 28 мартга қадар мамлакатда AstraZeneca Британия-Швеция фармкомпаниясининг коронавирусга қарши вакцинасидан фойдаланишни тўхтатиб қўйди. Бундай қарор Дания ва Норвегиядан келиб тушган эҳтимолий иккиламчи таъсирлар ҳақидаги хабарлардан кейин қабул қилинди. Гап эмланганларда тромблар ҳосил бўлиши хавфи ҳақида бормоқда. Ҳукумат баёнотида айтилишича, Нидерландияда бундай ҳолатлар қайд этилганича йўқ, тромблар айнан вакцина оқибатида юзага келиши борасида ҳам далиллар ҳозирча йўқ. Нидерландия ҳукумати Европа дори воситалари агентлиги (EMA) текшируви натижаларини кутмоқда. Вакцинадан фойдаланишни тўхтатиб туриш қарори туфайли вакцинацияга ёзилган 43 минг кишини қайтариб юборишга тўғри келади.

Ирландия Иммунизация кенгаши ҳукуматга AstraZeneca вакцинаси билан эмлашни кечиктиришни маслаҳат берди. Бундай тавсия эмлашдан кейин тромблар пайдо бўлиши бўйича янги ҳолатлар ҳақидаги хабарлардан кейин берилди. Расман Ирландия ҳукумати AstraZeneca’дан фойдаланишни тўхтатганича йўқ, аммо шу пайтгача доим Иммунизация кенгаши тавсияларига риоя қилиб келган.

Эслатиб ўтамиз, эмланганларда тромблар пайдо бўлиши билан боғлиқ бир нечта ҳолатлар ҳақидаги маълумотлардан кейин Дания AstraZeneca вакцинасидан фойдаланишни икки ҳафтага тўхтатиб қўйган эди. Даниянинг ортидан, AstraZeneca дориси билан эмлашни тўхтатиш ҳақидаги қарорларни Норвегия ва Исландия ҳам қабул қилди. Ушбу мамлакатлар ҳукуматлари қайд этишича, у ерларда иккиламчи таъсирлар билан боғлиқ ҳолатлар кузатилмаган, эмлашнинг тўхтатилиши эса Даниядан олинган маълумотга асосланган. 11 март куни Италия ҳам AstraZeneca’дан фойдаланишни тўхтатиб қўйди. Бу 43 ёшли эркакнинг ўлимидан кейин юз берди: у вакцинациянинг эртаси куни юрак тўхтаб қолишидан вафот этди — ҳукумат ушбу икки воқеанинг бир-бирига боғлиқлигини аниқлаштирмоқчи.

AstraZeneca компанияси эса ўзида бор маълумотлар эмланганларда тромблар ҳосил бўлишига унинг вакцинаси сабабчи бўлганини тасдиқламаслигини таъкидлади. Компания Евроиттифоқ ва Буюк Британияда эмланган 17 миллиондан ортиқ кишининг соғлиғи билан боғлиқ маълумотларни батафсил ўрганиб чиққан. У ерларда шу пайтгача 15 та чуқур веналар тромбози, 22 та ўпка артерияси эмболияси ҳолатлари қайд этилган. «Бу аҳоли ўртасида умуман кутилиши мумкин бўлганидан анча кам», — деган компаниядагилар. AstraZeneca учун одамларнинг хавфсизлиги биринчи ўринда экани, аммо тромблар пайдо бўлишига вакцина сабабчи эмаслиги қайд этилди.

Франция ҳукумати Париж касалхоналаридаги COVID-19’га чалинган беморларни мамлакатнинг бошқа шаҳарларига кўчириш қарори ҳақида эълон қилди. Бир ҳафта ичида Иль-де-Франц пойтахт минтақасидан 100 га яқин бемор бошқа жойларга кўчирилади. Бошқа шаҳарларга пойтахт касалхоналарининг интенсив даволаниш бўлимларидаги одамлар эвакуация қилинади. Бунинг учун ҳукумат махсус жиҳозланган поездлардан фойдаланади.

Айни пайтда Францияда тахминан 4,1 минг COVID-бемор интенсив терапия бўлимларида адаволанмоқда, уларнинг 1,1 минг нафари Париж ва унинг атрофларига тўғри келади. Францияда бир неча ойлардан буён кучли чеклов чоралари амал қилаётганига қарамай, сўнгги бир неча ҳафта давомида коронавирус тарқаилиши суръатлари ошиб кетди.

Молдовада ҳам коронавирус тарқаилиши билан боғлиқ вазият ёмонлашуви туфайли, Олий хавфсизлик кенгаши ҳукуматга ва парламентга мамлакатда икки ҳафтага фавқулодда ҳолат эълон қилишни тавсия этди. Кенгаш мажлисида коронавирус оқибатидаги талафотлар ҳар куни самолёт ҳалокатга учрашидан кўриладиган талафотга қиёсланди. Уч кун ичида янги фавқулодда ҳолат режаси ишлаб чиқилади ва парламентга тақдим этилади. У янги, янада қатъийроқ чекловлардан иборат бўлиши кутилмоқда.