Samarqandda kuyov qaynatasini pichoqladi. Jinoyat viloyat prokurori va IIB boshlig‘i ishtirokida muhokama qilindi

Samarqand viloyatining Kattaqo‘rg‘on shahrida kuyov o‘z qaynatasini pichoqladi. Bu haqda “Daryo”ga viloyat IIB axborot xizmati xabar berdi.

Ta’kidlanishicha, voqea 2021-yilning 8-mart kuni Kattaqo‘rg‘on shahrining “Oq oltin” mahallasida sodir bo‘lgan.

“Ushbu mahallada yashovchi Q.B. qaynatasinikiga mehmonga borib, spirtli ichimlik iste’mol qilgan va mast holda qaynatasi bilan tortishib qolgan. So‘ngra qaynatasi va uning ukasini oshxona pichog‘i bilan urib, tan jarohati yetkazgan”, — deyiladi IIB rasmiy axborotida.

Aytilishicha, ushbu voqea viloyat prokurori Ravshan Masharipov, IIB boshlig‘i Shavkat Rahmonov, Kattaqo‘rg‘on shahri hokimi, sektorlar hamda korxona-tashkilot rahbarlari, jinoyat sodir etgan fuqaro hamda mahalla faollari ishtirokida muhokama qilingan. Dastlab shahar IIB Tergov bo‘limi boshlig‘i sodir etilgan noxush holat sabablari va uning oqibatlari haqida jamoatchilikka axborot bergan.

“IIB boshlig‘i har bir fuqaro bunday salbiy holatlarga tomoshabin bo‘lib emas, balki uning oldini olishga harakat qilishi, mahallada bo‘layotgan noxush holatlarga barcha mas’uliyatni his etgan holda yondashishi lozimligini ta’kidladi. Muhokamada ushbu jinoyatni sodir qilgan shaxs, uning yaqinlari hamda jabrlanuvchi tarafga ham so‘z berildi. Viloyat prokurori esa joylardagi mahalliy hokimliklar, huquq-tartibot idoralari va keng jamoatchilik vakillari xonadonlarga borib, mavjud holatlarni o‘rganishi barobarida huquqbuzarliklarga imkon beradigan sabab hamda shart-sharoitni o‘rganishi, tahlil qilishi zarurligi haqida gapirdi”, — deydi viloyat IIB axborot xizmati mas’uli.

Qo‘shimcha qilinishicha, hozirda jabrlanuvchilarning ahvoli yaxshi. Holat yuzasidan esa Jinoyat kodeksining 104-moddasi 1-qismi (qasddan badanga og‘ir shikast yetkazish) bilan jinoyat ishi qo‘zg‘atilgan.