Jinoyat ishlari bo‘yicha Samarqand viloyati sudida 2020-yilning oktabrida Paxtachi tumanida ota-bolani o‘ldirgan shaxsga nisbatan qo‘zg‘atilgan ish ko‘rib chiqildi. Bu haqda “Yoshlar” telekanalining “Yangi davr” ko‘rsatuvida ma’lum qilindi.
Ma’lumotlarga ko‘ra, 2020-yil 8-oktabrga o‘tar kechasi soat 02:00 larda O.O. ismli shaxs o‘zining hamqishlog‘i — Paxtachi tumani Qarnobota qishlog‘ida yashovchi S.P.ning xonadoniga borgan (ma’lum bo‘lishicha, S.P. yashash uyidan oshxona ochgan) va uning hovlisida xonadon egasi bilan suhbat qilgan. Shunda uy egasi O.O.ga aroq ichishni taklif qiladi va uni olib chiqish uchun omborga kirib ketgan.
Paytdan foydalanib, sudlanuvchi uning orqasidan kirgan va o‘zi bilan olib kelgan bolg‘a yordamida uni urib o‘ldiradi. Uydagi qimmatbaho narsalarni olish uchun hovliga chiqqanida, xonadon egasining 19 yoshli o‘g‘li S.O‘. shovqindan uyg‘onib ketganini ko‘rgan.
Sudlanuvchi unga “otangning mazasi qochdi” deya uni omborga olib kirgan va uni ham bolg‘a bilan urib o‘ldirgan. Shundan so‘ng u uydan jami 72,7 million so‘mlik pul va qimmatbaho buyumlarni o‘g‘irlab ketgan.
Samarqand viloyati prokuraturasi xodimi sudda ayblanuvchi uchun Jinoyat kodeksining 59-moddasi (bir necha jinoyat sodir etganlik uchun jazo tayinlash) tartibida uzil-kesil 25 yil qamoq jazosi tayinlanishini so‘ragan. Sudning yakuniy hukmiga ko‘ra ayblanuvchi O.O. 22 yilga ozodlikdan mahrum etildi.
Avvalroq Toshkent viloyatida 22 yoshli yigit 60 yoshli haydovchining Matiz’ini “zapchast”ga sotish uchun unga 42 marta pichoq urib o‘ldirgani, Samarqandda akasini o‘ldirgandan so‘ng jasadini bo‘laklarga bo‘lib, kanalga oqizib yuborgan uka, Namanganda ota-onasini qo‘rqitib qo‘yish uchun sevgan qiziga pichoq urib o‘ldirib qo‘ygan yigit va Jizzaxda 18 yoshli qizning qotili olti yildan so‘ng qamoqqa olingani haqida xabar berilgandi.
Izoh (0)