2021-yilning 28-fevral kuni Nijniy Novgorod yaqinidagi uyning biridan voyaga yetmagan bola, uning onasi, buvisi va bobosining jasadlari topildi. Ular vahshiylarcha o‘ldirilgan, deb xabar beradi BBC. Gumonlanuvchi qo‘shni Vladimir viloyatida qo‘lga olingan bo‘lib, u O‘zbekiston fuqarosi ekanligi aytilmoqda.

Foto: “NNovgorod.Sledcom.ru”

Rossiya Tergov qo‘mitasi shaharning Kudma posyolkasida sodir bo‘lgan mudhish voqea to‘g‘risidagi xabarlarni tasdiqlagan — besh yoshli bolakay, 41 yoshli ona 63 yoshli buvi va 64 yoshli bobo o‘ldirib ketilgan.

Marhumlar jasadini tekshirish vaqtida zo‘ravonlik alomatlari aniqlangan. Holat yuzasidan Rossiya Jinoyat kodeksining 105-modda (ikki yoki undan ortiq kishining o‘ldirilishi) 2-qismi “a” bandi bilan jinoyat ishi qo‘zg‘atilgan. Tergov hozircha fojia yuzasidan boshqa ma’lumotlarni oshkor etmagan.

Mamlakat Ichki ishlar vazirligining ma’lum qilishicha, ikki nafar gumonlanuvchi Nijegorod bilan qo‘shni bo‘lgan Vladimir viloyati hududida YHXBB xodimlari tomonidan qo‘lga olingan. Tergov qo‘mitasi esa gumonlanuvchilar bir kishi ekanligini bildirmoqda.

Jinoyat ishida o‘ldirib ketilgan oilaning uchastkasida mehnat qilgan ishchilar gumon qilinmoqda, ular ushbu jinoyatni o‘g‘rilik maqsadida amalga oshirgan bo‘lishlari mumkin.

“Interfaks”ning yozishicha, gumonlanuvchi bir kishi — O‘zbekiston fuqarosi. “U oilada ishlagan. Qotillik sabablari o‘rnatilmoqda”, — deyiladi xabarda. Nashr manbasining so‘zlariga ko‘ra, qurbonlar gumonlanuvchi tomonidan pichoqlangan yoki bo‘g‘ib o‘ldirilgan. “Ham pichoq, ham bo‘g‘ib o‘ldirish alomatlari mavjud”, — deydi manba.

“Gumonlanuvchi O‘zbekistondan kelgan bo‘lib, oilada turli ishlarni bajargan. Qotillik o‘g‘rilik maqsadida amalga oshirilgan bo‘lishi mumkin”, — deydi “RIA Novosti” manbasi.

Rossiya Tergov qo‘mitasining Nijegorod boshqarmasi to‘rt kishidan iborat oilaning o‘ldirilishida 26 yoshli erkak gumonlanayotganini ma’lum qilgan. Shuningdek, gumonlanuvchining tergov vaqtida olingan surati ham e’lon qilingan.

Foto: “NNovgorod.Sledcom.ru”

Tergov qo‘mitasining press-relizida yozilishicha, gumonlanuvchi avval garajda ishlayotgan 64 yoshli nafaqaxo‘rga hujum qilgan, shundan so‘ng uning uydagi 63 yoshli rafiqasiga tashlanib, jabrlanuvchiga pichoq orqali jarohat yetkazgan.

“Keyin esa 41 yoshli kelinini va uning besh yoshli o‘g‘lini o‘ldirgan. Katta miqdordagi pul va qimmatbaho buyumlarni o‘g‘irlab, voqea joyidan yashiringan”, — deyiladi bayonotda.

“Interfaks” manbasining ma’lumotlariga ko‘ra, gumonlanuvchi qo‘lga olish rejasi bo‘yicha uni olib ketayotgan taksichi yordamida ushlangan. “U taksichiga 45 ming rubl bergan, Sankt-Peterburgga bormoqchi bo‘lgan”, — deydi agentlik manbasi.

Oilaning ikki a’zosi — to‘ng‘ich qiz va uning otasi fojia vaqti uyda bo‘lmagani sabab omon qolgan.