Markaziy bankning Naqd pul muomalasi departamenti direktori Fazliddin Bozorov naqd pullarning holati, ulardan foydalanish, shuningdek, vaqt o‘tib naqd ko‘rinishdagi pullarning mutlaqo muomaladan chiqishi mumkinligiga oid savollarga javob berdi.
“Naqd pullardan voz kechib, hisob-kitoblarni naqdsiz ko‘rinishda amalga oshirishga o‘tishning afzalliklari ko‘p va eng asosiysi, iqtisodiyotda pul aylanishi tezlashadi. Bunday jarayon tabiiy ravishda hamda hukumatning qo‘llab-quvvatlashi orqali aholiga qiyinchilik tug‘dirmagan holda ro‘y berishi, bosqichma-bosqich joriy etilishi maqsadga muvofiq hisoblanadi.
Masalan, dastlab kommunal to‘lovlarni faqat naqdsiz shaklda to‘lash, ayrim yirik savdo va umumiy ovqatlanish korxonalari tomonidan to‘lovlarni faqat bank kartalari orqali qabul qilish kabi tartiblarni joriy etish sekin-asta savolda qo‘yilgan jarayonga yetaklashi mumkin”, — deydi u.
Ma’lum qilinishicha, Shvetsiya davlati naqd pullardan voz kechish siyosatini 2015-yilda boshlagan bo‘lib, bugungi kunda ushbu davlatda restoranlar, dorixonalar va savdo korxonalari to‘lov uchun naqd pullarni qabul qilishni rad etish huquqiga ega.
“Ayrim ommaviy axborot vositalarida Nyu-York shahridagi bir qator savdo korxonalari va restoranlar to‘lovlarni faqat naqdsiz ko‘rinishda qabul qilishni tajriba tariqasida qo‘llab ko‘rishi ba’zi aholi vakillarining e’tirozlariga sabab bo‘layotganini yozmoqda.
Endi O‘zbekiston misolida shu jarayonni tasavvur qilib, xulosa qilib ko‘ring-chi, buning uchun bizda yetarli shart-sharoit mavjudmi, aholining dunyoqarashi shakllanganmi? Oddiygina misol, mamlakatda oylik ish haqini va pensiya to‘lovlarini bank kartalari orqali to‘lanishiga e’tiroz bildiruvchi fuqarolar ko‘plab topiladi”, — deydi Bozorov.
Eslatib o‘tamiz, Markaziy bank ma’lumotiga ko‘ra, 2021-yil yanvar oyida banklar orqali naqd pul aylanmasi hajmi 32,1 trillion so‘mni tashkil etgan.
Izoh (0)