Navoiy viloyatining Nurota tumanida xotiniga pichoq o‘qtalib, uni qo‘rqitmoqchi bo‘lgan shaxs qo‘lga olindi. Bu haqda “Daryo”ga viloyat IIB axborot xizmati rahbari O‘ktam Usmonov ma’lum qildi.
Ma’lum bo‘lishicha, viloyatning Nurota tumanida yashovchi 35 yoshli fuqaro A.Sh. xotini M.S. bilan har doim janjallashib kelgan. Er-xotin o‘rtasidagi nizo ko‘plab urush-janjallarga sabab bo‘lgan.
“Fuqaroning xotini bilan navbatdagi tortishuvi turmush o‘rtog‘i faoliyat yurituvchi tuman tibbiyot birlashmasida sodir bo‘lgan. Er turli shubha-gumon, asossiz sabablar bilan janjal ko‘tarib, xotini M.S.ning yoniga kelgan va unga pichoq o‘qtalgan. Shuningdek, unga tazyiq o‘tkazib, janjal paytida xotiniga tan jarohati ham yetkazgan”, — deydi O‘ktam Usmonov.
Aytilishicha, zo‘ravon er voqea joyiga yetib kelgan IIB xodimlariga xotiniga zarar yetkazish niyati yo‘qligini, uni shunchaki qo‘rqitib qo‘ymoqchiligini bildirgan. Xotiniga yetkazilgan tan jarohatini esa “sal pichoq kesib ketdi”, deya izohlagan.
Fuqaroning xatti-harakatlarida jinoyat alomatlari mavjudligi bois Nurota tuman IIB tergov bo‘limi tomonidan fuqaro A.Sh.ga nisbatan Jinoyat kodeksining 112-moddasi (o‘ldirish yoki zo‘rlik ishlatish bilan qo‘rqitish) bilan ish qo‘zg‘atilgan. Va surishtiruv ishlari boshlangan.
Qo‘shimcha qilinishicha, 16 yil birga yashagan er-xotin mazkur voqeadan so‘ng ajrashishga qaror qilgan.
Izoh (0)