Самарқанд вилоятининг Каттақўрғон шаҳрида куёв ўз қайнатасини пичоқлади. Бу ҳақда «Дарё»га вилоят ИИБ ахборот хизмати хабар берди.
Таъкидланишича, воқеа 2021 йилнинг 8 март куни Каттақўрғон шаҳрининг «Оқ олтин» маҳалласида содир бўлган.
«Ушбу маҳаллада яшовчи Қ.Б. қайнатасиникига меҳмонга бориб, спиртли ичимлик истеъмол қилган ва маст ҳолда қайнатаси билан тортишиб қолган. Сўнгра қайнатаси ва унинг укасини ошхона пичоғи билан уриб, тан жароҳати етказган», — дейилади ИИБ расмий ахборотида.
Айтилишича, ушбу воқеа вилоят прокурори Равшан Машарипов, ИИБ бошлиғи Шавкат Раҳмонов, Каттақўрғон шаҳри ҳокими, секторлар ҳамда корхона-ташкилот раҳбарлари, жиноят содир этган фуқаро ҳамда маҳалла фаоллари иштирокида муҳокама қилинган. Дастлаб шаҳар ИИБ Тергов бўлими бошлиғи содир этилган нохуш ҳолат сабаблари ва унинг оқибатлари ҳақида жамоатчиликка ахборот берган.
«ИИБ бошлиғи ҳар бир фуқаро бундай салбий ҳолатларга томошабин бўлиб эмас, балки унинг олдини олишга ҳаракат қилиши, маҳаллада бўлаётган нохуш ҳолатларга барча масъулиятни ҳис этган ҳолда ёндашиши лозимлигини таъкидлади. Муҳокамада ушбу жиноятни содир қилган шахс, унинг яқинлари ҳамда жабрланувчи тарафга ҳам сўз берилди. Вилоят прокурори эса жойлардаги маҳаллий ҳокимликлар, ҳуқуқ-тартибот идоралари ва кенг жамоатчилик вакиллари хонадонларга бориб, мавжуд ҳолатларни ўрганиши баробарида ҳуқуқбузарликларга имкон берадиган сабаб ҳамда шарт-шароитни ўрганиши, таҳлил қилиши зарурлиги ҳақида гапирди», — дейди вилоят ИИБ ахборот хизмати масъули.
Қўшимча қилинишича, ҳозирда жабрланувчиларнинг аҳволи яхши. Ҳолат юзасидан эса Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган.
Изоҳ (0)