Toshkent shahrining Bektemir tumanida kuyov shar’iy nikohida bo‘lgan ayoli o‘rtasida kelib chiqqan o‘zaro kelishmovchilik oqibatida uning onasiga tan jarohati yetkazib, otasiga pichoq urdi. Bu haqda Oliy sud matbuot xizmati xabar berdi.
Jinoyat ishlari bo‘yicha Bektemir tuman sudi raisi Iroda Muhamedovaning ma’lum qilishicha, voqea 2020-yil 29-iyulda yuz bergan.
K.I. turmushidan ajrashgan, bir nafar farzandi borligiga qaramay, 2016-yilda tanishgan D.H. bilan shar’iy nikohdan o‘tib, yashab kelgan. Bundan faqat ayolning ota-onasi xabardor bo‘lgan. 2017-yilda yigit ota-onasining qistovi bilan M. ismli qizga qonunan uylangan va har ikkisi bilan ham yashay boshlagan. 2019-yilning dekabrida M. qiz farzand, 2020-yilning fevralida D.H. o‘g‘il farzand ko‘rgan.
2020-yilning mart–aprel oylarida K.I. va D.H. o‘rtalarida tushunmovchiliklar avjiga chiqib, tez-tez janjal bo‘lib turgan. Shu sababli D.H. arazlab, qarindoshlarining uyiga ketib qoladigan odat chiqargan. 2020-yilning 24-iyul kuni turmush o‘rtog‘i D.H.ni yo‘qotib qo‘yib, u bilan ikki kun qo‘ng‘iroq qilib bog‘lana olmagan. 26-iyul kuni qo‘ng‘iroq qilganida ayol Nurafshon shahrida yashovchi xolasining uyida ekanligini aytgan, K.I. uning gaplariga ishonmay, xiyonatda gumon qilgan.
Janjal bir necha kun davom etgan. K.I. ayoliga uning bu yurishi bolasi tarbiyasiga salbiy ta’sir ko‘rsatishini aytib, uni olib qo‘yishini bildirgan. O‘sha voqea sodir bo‘lgan kuni er uning uyiga borgan va eshik yopiqligi uchun devor orqali hovliga sakrab tushgan. Yo‘lini qaynanasi G.H. to‘sganida uni tirsagi bilan turtib yuborgan. Oqibatda u yiqilib, tan jarohati olgan.
Bu holatni ko‘rgan qaynatasi S.H. uning yoniga kelib, bor kuchi bilan yoqasidan tortgan. Bundan jahl chiqqan K.I. cho‘ntagida bo‘lgan suvenir (finka) pichoq bilan uning ko‘krak, qorin va yelka sohasiga tan jarohati yetkazib, hodisa joyidan yashiringan. IIB xodimlari tomonidan olib borilgan tezkor surishtiruv ishlari natijasida K.I. o‘z xonadonida qo‘lga olingan.
K.I. Jinoyat kodeksining 104-moddasi (qasddan badanga og‘ir shikast yetkazish) 3‑qismi “a” bandi bilan aybli, deb topilgan. Sudda u qilmishidan pushaymonligini, hammasini jahl ustida qilganini aytgan. Unga nisbatan Jinoyat kodeksining 57‑moddasi (yengilroq jazo tayinlash)ni qo‘llagan holda 5 yil ozodlikdan mahrum qilish jazosi tayinlangan.
Avvalroq Farg‘onada kelinini pichoqlab o‘ldirgan qaynata 10 yilga ozodlikdan mahrum qilingani, Andijonda sobiq turmush o‘rtog‘i va qaynatasini pichoqlab o‘ldirgan erkak qo‘lga olingani, Farg‘onalik erkak homilador xotini va qaynatasini chopib tashlagani haqida xabar berilgan edi.
Izoh (0)