“Ilgari jinoyatchilik ko‘lamiga raqamlarga qarab baho berar edik, buning ortida inson taqdiri yotganini unutib qo‘yardik” — Po‘lat Bobojonov

12-mart kuni Toshkent shahrida O‘zbekiston Oliy Majlis Senatining o‘n uchinchi yalpi majlisi o‘z ishini boshlagani to‘g‘risida xabar berilgandi. “Xalq so‘zi Online”ning yozishicha, majlisda ichki ishlar vaziri Po‘lat Bobojonovning huquqbuzarliklarning oldini olish va ularning profilaktikasi holati to‘g‘risidagi 2020-yil yakuni bo‘yicha axboroti eshitilgan.

Ichki ishlar vaziri o‘z axborotida ilgari jinoyatchilik ko‘lami faqat raqamlar orqali baholangani, hozirda bu tizim ancha o‘zgargani haqida to‘xtalib o‘tgan.

“Jinoyatchilikka qarshi kurashda raqam ortidan quvish emas, jinoyatchilikning asl sabablarini bartaraf etish orqali fuqarolarning haq-huquqlarini himoya qilishga asosiy e’tibor qaratildi. Ilgari jinoyatchilik ko‘lamiga raqamlarga asosan ‘ko‘paydi-kamaydi’ deya baho berar edik, buning ortida inson taqdiri yotganini unutib qo‘yardik.

Eng achinarlisi ko‘rsatkichlarni sun’iy ravishda yaxshilash uchun jinoyatni hisobdan yashirishga urinadigan holatlar bor edi. Yoki jinoyat sonini oshirmaslik uchun odam savdosi, fohishabozlik, giyohvandlik, korrupsiya bilan bog‘liq jinoyatlarni aniqlashda tashabbus ko‘rsatilmas edi. Endilikda bu salbiy illatdan voz kechildi va vaziyat hududdagi haqiqiy ahvolga qarab baholanmoqda”, — deydi Po‘lat Bobojonov.

Eslatib o‘tamiz, 2020-yilning avgustida ichki ishlar vaziri Po‘lat Bobojonov O‘zbekistondagi jazoni ijro etish tizimidagi mahkumlar sonini ma’lum qilgandi.