“Jinoyatchilikka qarshi kurashish zarbdor oyligi” doirasida huquqni muhofaza qiluvchi idoralar hamkorligida o‘tkazilgan tezkor tadbirda Buxoro tumani hokimligi zaxirasida bo‘lgan yer maydonini sotmoqchi bo‘lgan shaxs qo‘lga olindi, deb xabar bermoqda “Xalq so‘zi online”.
Buxoro viloyati IIB, prokuratura huzuridagi departament hamda DXX Buxoro viloyat boshqarmasi xodimlarining hamkorlikdagi tezkor tadbirida S.X. noqonuniy daromad orttirish maqsadida fuqaro F.ning ishonchiga kirib, unga Buxoro tuman hokimiyatining tasarrufida bo‘lgan 10,8 sotix zaxira yer maydonini sotishni rejalashtirib, oldindan kelishilgan 23 500 dollarni firibgarlik yo‘li bilan olgan vaqtida ashyoviy dalillar bilan qo‘lga olingan.
Holat yuzasidan S.X.ga nisbatan Jinoyat kodeksining 25, 168-moddasi (firibgarlik) bilan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq Buxoroda 23 sotix yerni rasmiylashtirishda yordam berish evaziga oldindan 100 dollar va 2 mln so‘m olgan kadastr xodimiga jinoyat ishi qo‘zg‘atilgani haqida xabar berilgan edi,
Shuningdek, Farg‘onada 8 gektar yer olishda yordam berish evaziga 8 ming dollar olgan sobiq kadastr xodimi, Xorazmda 5 ming dollar evaziga yer olib berishni va’da qilgan shaxslar ushlangani, Andijon viloyati Buloqboshi tumani qurilish bo‘limi mutaxassisi 6 sotix yerni turar joy toifasiga o‘zgartirib berish evaziga 500 dollar miqdorida pora olayotganida ushlangani, yer olib berishni va’da qilib, pora bilan qo‘lga tushgan Marhamat tumani hokimining sobiq yordamchisi 7 yilga ozodlikdan mahrum qilingani haqida xabar berilgandi.
Izoh (0)