Fevral oyidan Polshadan chiqarib yuborilgan Rossiyaning Poznan shahridagi bosh konsuli Igor Oshepkov koronavirus bilan kasallangan va fuqarolarning hayotini xavf ostiga qo‘yib o‘zini izolyatsiya qilmagan. Bu haqda Polsha maxsus xizmatining matbuot kotibi Stanislav Jaringa tayanib Meduza xabar berdi.
Uning so‘zlariga ko‘ra, Oshepkov 21-yanvar kuni koronavirusga topshirgan testi ijobiy chiqishiga qaramay, sanitariya qoidalariga rioya qilmagan, jamoat joylariga borgan va odamlar bilan uchrashgan. Jarin bu harakatlari tufayli konsulni mas’uliyatsiz va xavfli deb atadi. Buning natijasida boshqa odamlar virus bilan kasallanishi va virusning yangi to‘lqini paydo bo‘lishi mumkin edi, deb ta’kidladi matbuot kotibi.
8-fevral kuni Polsha, Germaniya va Shvetsiya bir vaqtning o‘zida uchta rossiyalik diplomatning chiqarib yuborilishini e’lon qildi.
Avvalroq Rossiya Tashqi ishlar vaziri Sankt Peterburgdagi Shvetsiya va Polsha, Moskvadagi Germaniya bosh konsullaridan mamlakatdan chiqib ketishini talab qilgan. Ma’lumotlarga ko‘ra, ular 23-yanvar kuni siyosatchi Aleksey Navalniyni qo‘llab-quvvatlash aksiyasida qatnashgan.
Izoh (0)