Quyi Chirchiqda 60 yoshli haydovchining tanasiga 42 marta pichoq urib, uning Matiz’ini qismlarga bo‘lib, sotib yuborgan yigitlarga hukm o‘qildi. Haydovchi ko‘p qon yo‘qotish oqibatida vafot etgan. Bu haqda “O‘zbekiston” telekanalining “Bir jinoyat izidan” ko‘rsatuviga asoslanib “Xalq so‘zi Online” xabar qilindi.
Toshkent viloyatining Quyi Chirchiq tumani IIBga 2020-yil 17-mart kuni “Birlik” mahallasi hududidan o‘tuvchi To‘ytepa—Oqqo‘rg‘on—Yangiyo‘l avtomagistral yo‘li chetidagi dala maydonida yoshi, taxminan, 60 larda bo‘lgan noma’lum erkak kishining murdasi yotgani haqida xabar kelib tushadi. Shundan so‘ng tezkor tergov guruhi tuzilib, Jinoyat kodeksining 97-moddasi 1-qismi bilan jinoyat ishi qo‘zg‘atilgan.
Ma’lum qilinishicha, sud tibbiy-ekspertiza xulosasiga ko‘ra, marhumning tanasida 42 ta jarohat izi topilgan va u ko‘p qon yo‘qotish oqibatida vafot etgan.
Shu kunning o‘zida Toshkent viloyat prokuraturasi xodimlari murdaning shaxsini aniqlagan. Marhum o‘zining Matiz avtomashinasida kirakashlik qiluvchi, 1960-yilda Oqqo‘rg‘on tumanida tug‘ilgan D.X. bo‘lib chiqqan.
“Dastlabki tergov harakatlari davomida 1999-yilda tug‘ilgan J.M. o‘zining jinoiy sherigi S.H. bilan fuqarolarning avtomashinasini talonchilik, bosqinchilik yo‘li bilan egallab, qismlarga bo‘lib sotish orqali boylik orttirishni o‘ziga maqsad qilib olgan”, — deydi Bosh prokuratura boshqarma boshlig‘i Azimjon Yo‘ldoshev.
Jinoyat tafsilotlariga ko‘ra, 1999-yili Chinoz tumanida tug‘ilgan J.M. 2020-yilning 16-mart kunidan 17-mart kuniga o‘tar kechasi Toshkent—Do‘stobod avtomagistral yo‘liga chiqib, D.X. boshqaruvidagi Matiz rusumli avtomashinani to‘xtatib, yo‘lovchi sifatida o‘tiradi va Yangiyo‘l tumanigacha borishini aytadi. Avtomashinada bo‘lgan qolgan yo‘lovchilar tushib qolgach, J.M. o‘zida olib yurgan pichog‘i bilan haydovchiga hujum qiladi. U marhumga jami 42 marotaba kesuvchi-sanchuvchi jarohat yetkazgan va avtomashinani sherigi S.H.ning uyiga olib borgan.
S.H. mashinani ehtiyot qismlariga ajratish uchun qarindoshi M.U.ni yordamga chaqiradi va dalillar yo‘q qilinadi.
“Ayblanuvchilar J.M., S.H. va M.U.ga Jinoyat kodeksi 97-moddasi 2-qismining (qasddan odam o‘ldirish) tegishli bandlari hamda Jinoyat kodeksining boshqa moddalari bilan ayb e’lon qilinib, ayblari dastlabki tergov jarayonlarida o‘z tasdig‘ini topdi va sudga yuborildi”, — deydi Toshkent viloyat prokuraturasi bo‘lim boshlig‘i Abdurahmon Hojiyev.
Jinoyatchilar mashinaning ayrim ehtiyot qismlarini Sergeli mashina bozoriga olib chiqib, sotib yuborgan.
Jinoyat ishlari bo‘yicha Toshkent viloyat sudining 2020-yil 7-sentabrdagi hukmiga ko‘ra, J.M. 18 yil, S.H. 11 yil muddatga ozodlikdan mahrum qilindi, M.U.ga esa 4 yil 6 oyga ozodlikdan cheklash jazosi tayinlangan.
Bundan avval Toshkentda qaynonasiga tan jarohati yetkazib, qaynotasiga pichoq urgan erkak 5 yilga qamalgani, Samarqandda turmush o‘rtog‘ini pichoqlab o‘ldirgan shaxs 9 yilga qamalgani hamda Samarqandda to‘rt yigit ularning ayol qarindoshiga birga bo‘lishni taklif qilgan erkakni o‘ldirib, jasadini kanalga oqizib yuborgani haqida xabar berilgandi.
Izoh (0)