BMTning Bolalar fondi (YuNISEF) O‘zbekiston Sog‘liqni saqlash vazirligiga patronaj (uyga tashrif buyurish)ning universal-progressiv modeli bo‘yicha 50 ming nusxada qo‘llanma va kitobchalarni topshirdi.
YuNISEFning O‘zbekistondagi vakolatxonasi ma’lum qilishicha, ushbu nashrlar homilador va yaqinda farzand ko‘rgan ayollar, shuningdek, besh yoshgacha bo‘lgan bolalarga xizmat ko‘rsatadigan hamda aholi vaksinatsiya, homiladorlar salomatligi nazorati, kasalliklarni davolash uchun murojaat qiladigan asosiy xizmatlar ko‘rsatiladigan birlamchi tibbiyot-sanitariya muassasalari faoliyatini yanada yaxshilashga qaratilgan.
Ushbu materiallar bolalarning erta yoshdagi rivojlanishi, oziqlanish va ruhiy-ijtimoiy qo‘llab-quvvatlash bo‘yicha ilmiy dalillarga asoslangan xalqaro tavsiyalar va standartlar asosida ishlab chiqilgan. Ular patronaj hamshiralarning kasbiy bilim va ko‘nikmalarini oshirishda yo‘riqnoma bo‘lib xizmat qiladi.
Tadqiqot natijalari patronaj dasturlari ota-onalik ko‘nikmalariga ijobiy ta’sir ko‘rsatishi, ota-onalar va farzandlarning salomatligi hamda farovonligini yaxshilashini ko‘rsatgan.
“Integratsiyalashgan oilaviy xizmatlar to‘plami transformatsion model bo‘lib, oilaga ko‘rsatiladigan xizmatlarni taqdim etish bo‘yicha katta salohiyatga ega. Sog‘liqni saqlash tizimi shahar va qishloq joylarida, shu jumladan, olis hududlarda oilalar, homilador ayollar va yosh bolalar bilan muloqot qilish uchun katta imkoniyatlarga ega” — degan YuNISEFning O‘zbekistondagi vakolatxonasi rahbari Munir Mamedzoda.
“Patronaj dasturlari individual yordamni ta’minlashda, muhtoj oilalarga va jamoalarga to‘g‘ridan to‘g‘ri yordam ko‘rsatishda, ota-onalar va parvarishlovchilarni qo‘llab-quvvatlashda, hamda ularning yosh bolalari uchun eng yaxshi sharoitlarni yaratishda hal qiluvchi va muhim ahamiyatga ega”,— deb ta’kidlagan u.
“Patronaj xizmatining yangi modeli nafaqat kasallik va tibbiy muammolarni aniqlashga, balki tibbiy-ijtimoiy, ma’rifiy va boshqa sog‘liqni saqlash tadbirlari to‘plamini sifatli amalga oshirishga ham e’tiborni qaratadi”, — degan hamshiralik ishi bo‘yicha bosh mutaxassis Rixsi Solixo‘jayeva.
Xabarda aytilishicha, yo‘riqnoma va kitobchalarni ishlab chiqish va nashr etish universal-progressiv patronaj modelini amalga oshirishdagi birinchi qadamdir. YuNISEF Sog‘liqni saqlash vazirligi bilan birgalikda ushbu yo‘nalishdagi ishlarni davom ettirishni rejalashtirgan. Hozir patronaj hamshiralarni yangi metodikaga o‘rgatadigan trenerlar guruhi tayyorlanmoqda.
Yangi model hamshiralarning diplom oldi o‘qish va malaka oshirish tizimiga kiritiladi. Barcha sa’y-harakatlar natijasida tibbiy yordam sifatini yaxshilash, yordam va g‘amxo‘rlikka muhtoj oilalarni qo‘llab-quvvatlashni yanada yaxshilash mumkin bo‘ladi.
Avvalroq YuNISEF O‘zbekistonga ijtimoiy himoyani mustahkamlash uchun uskunalar sovg‘a qilgani haqida xabar berilgan edi.
Izoh (0)