Samarqandda 2020-yil qurilish sohasida 2385 ta qonunbuzilishiga yo‘l qo‘yilgani ma’lum bo‘ldi

Samarqand viloyatida noqonuniy qurilishlarning oldini olish va ularni bartaraf etish yuzasidan tashkil etilgan doimiy ishlovchi komissiya 2020-yilda viloyatda qurilish sohasida 2385 ta qonunbuzilish holatini aniqlagan. Bu haqda “Daryo”ga viloyat bosh arxitektori Hayot Mirzayev ma’lum qildi.

Aniqlangan qonunbuzilishlarning 808 tasi komissiyalar va ma’muriy organlar tomonidan bartaraf etilgan. 90 tasi qonun talablariga muvofiqlashtirilgan va 1487 ta holat bo‘yicha qonuniy chora ko‘rish ishlari davom etmoqda.

“2020-yilda Qurilish vazirligi tomonidan ‘Shaffof qurilish’ tizimi joriy etilgan bo‘lib, 2021-yil 1-yanvardan ushbu portal ishga tushirildi. Mazkur tizimga 2020-yilda 740 ta, 2021-yilning shu kunigacha 6 ta qurilish obyekti kiritildi. Bu qurilish obyektlariga biriktirilgan buyurtmachi, loyihachi va qurilish nazorati inspeksiyasi inspektorlariga bu tizimga ulanish uchun planshet berildi va GPSlar o‘rnatilgan. Natijada inspektorlar tomonidan qurilish obyektlari doimiy nazoratga olinishi bosqichma-bosqich yo‘lga qo‘yilmoqda”, — dedi Hayot Mirzayev.

Hayot Mirzaevning ta’kidlashicha, amalga oshirilgan ishlarga qaramasdan yuridik va jismoniy shaxslar tomonidan noqonuniy qurilishlarni hamda tegishli ruxsat beruvchi shaharsozlik hujjatlarisiz qurilish-montaj ishlarini amalga oshirishga nisbatan qonuniy choralar ko‘rish bo‘yicha vakolatli organlar hamda komissiyalarning reaksiyasi yetarli bo‘lmayotganligi natijasida hududlarda o‘zboshimchalik bilan amalga oshirilgan tartibsiz qurilishlar ko‘payib bormoqda.

“Ayniqsa, bu kabi holatlarni xususiy sektorlar tomonidan olib borilayotgan qurilishlarda ko‘p uchratishimiz mumkin. Shuningdek, aksariyat xususiy sektorlar tomonidan qurilish amalga oshirilayotgan ob’ektlarda qurilish madaniyatiga mutlaqo e’tibor qaratilmasdan kelinmoqda”, — deydi mas‘ul.