Ijtimoiy tarmoqlarda 2021-yilgi Haj mavsumiga ruxsat berilgani, buning uchun ziyoratchilar emlangan bo‘lishi kerakligi to‘g‘risida xabarlar tarqaldi. Ushbu masalada Din ishlari bo‘yicha qo‘mita murojaat bilan chiqdi.
Qayd etilishicha, qo‘mita Saudiya Arabistoni rasmiylari hamda Haj va Umra ishlari bo‘yicha attashe bilan mazkur masalada muntazam aloqa o‘rnatgan.
Ma’lum qilinishicha, ijtimoiy tarmoqlarda “Muqaddas Haj safariga rasman ruxsat berildi. Faqatgina haj safariga bormoqchi bo‘lganlar koronavirusga qarshi vaksina qabul qilgan bo‘lishlari shart” va boshqa shu kabi sarlavhalar ostida tarqatilayotgan xabarlar hech qanday rasmiy asosga ega emas.
Shuningdek, bu kabi xabarlarning tarqalishi va turlicha talqin qilinishi – Saudiya Arabistoni sog‘liqni saqlash vazirining “Haj mavsumi ziyoratchilarini qabul qilishning asosiy sharti – COVID-19’ga qarshi emlangani bo‘ladi”, mazmunidagi intervyusiga asoslangan.
Shu bilan birga, Haj va Umra tadbirlarini tashkil etish bo‘yicha Saudiya Arabistoni hukumati tomonidan hozirga qadar hech qanday rasmiy qaror e’lon qilinmagan.
Haj va umra ziyoratlari bilan bog‘liq asosli ma’lumotlar Din ishlari bo‘yicha qo‘mitaning rasmiy veb-sayti va ijtimoiy tarmoq sahifalari orqali e’lon qilinishi eslatib o‘tilgan.
Eslatib o‘tamiz, mart oyi o‘rtalarida Saudiya Arabistoni podshohligida jamoat namozlari vaqtincha to‘xtatilgan va faqat ikkita — Makka hamda Madinadagi masjidda jamoat bo‘lib namoz o‘qishga ruxsat berilgandi. Biroq keyinchalik koronavirus tarqalishi xavfi sabab Al-Harom va Nabaviy Masjidda ham namoz o‘qish to‘xtatilgan. 23-mart kuni Saudiya Arabistonida komendantlik soati joriy etilgan, 24-mart kuni mamlakatda koronavirus bilan bog‘liq birinchi o‘lim holati qayd etilgan. Shuningdek, mamlakatda aholi hamda xorijlik ziyoratchilar uchun Umra ziyoratini amalga oshirish tadbirlari ham noma’lum muddatga qoldirilgandi.
7-aprelda Saudiya Arabistoni Ramazon oyida masjidlarni ochishni rejalashtirmayotgani aytilgan, 13-aprel kuni Ramazon oyida Saudiya Arabistonida taroveh namozlari uyda o‘qilishi haqida fatvo berilgani haqida xabar qilingan, keyinchalik shu kuni O‘zbekiston musulmonlari idorasining Ramazon oyini o‘tkazish haqidagi bayonotida taroveh namozlarini uyda o‘qish tavsiya qilindi. 18-aprel kuni Tojikistonda masjidlar yana yopilgani, juma va taroveh namozlari masjidlarda o‘qilmasligi, ushbu choralar koronavirusning tarqalishini oldini olish maqsadida amalga oshirilgani haqida xabarlar tarqaldi. Saudiya Arabistonida komendantlik soati 21-iyundan bekor qilingan, biroq shunga qaramay, ko‘plab cheklovlar o‘z kuchida qolgan.
Saudiya Arabistoni oktabr oyidan boshlab mamlakatda yashovchi aholisi uchun Umra ziyoratini amalga oshirishga ruxsat bergan edi. Va o‘sha oy o‘rtalarida mamlakat hukumati yetti oy ichida birinchi marta Makkadagi Al-Harom masjidida namoz o‘qilishiga ruxsat berdi.
Izoh (0)