БМТнинг Болалар фонди (ЮНИСЕФ) Ўзбекистон Соғлиқни сақлаш вазирлигига патронаж (уйга ташриф буюриш)нинг универсал-прогрессив модели бўйича 50 минг нусхада қўлланма ва китобчаларни топширди.
ЮНИСЕФнинг Ўзбекистондаги ваколатхонаси маълум қилишича, ушбу нашрлар ҳомиладор ва яқинда фарзанд кўрган аёллар, шунингдек, беш ёшгача бўлган болаларга хизмат кўрсатадиган ҳамда аҳоли вакцинация, ҳомиладорлар саломатлиги назорати, касалликларни даволаш учун мурожаат қиладиган асосий хизматлар кўрсатиладиган бирламчи тиббиёт-санитария муассасалари фаолиятини янада яхшилашга қаратилган.
Ушбу материаллар болаларнинг эрта ёшдаги ривожланиши, озиқланиш ва руҳий-ижтимоий қўллаб-қувватлаш бўйича илмий далилларга асосланган халқаро тавсиялар ва стандартлар асосида ишлаб чиқилган. Улар патронаж ҳамшираларнинг касбий билим ва кўникмаларини оширишда йўриқнома бўлиб хизмат қилади.
Тадқиқот натижалари патронаж дастурлари ота-оналик кўникмаларига ижобий таъсир кўрсатиши, ота-оналар ва фарзандларнинг саломатлиги ҳамда фаровонлигини яхшилашини кўрсатган.
«Интеграциялашган оилавий хизматлар тўплами трансформацион модель бўлиб, оилага кўрсатиладиган хизматларни тақдим этиш бўйича катта салоҳиятга эга. Соғлиқни сақлаш тизими шаҳар ва қишлоқ жойларида, шу жумладан, олис ҳудудларда оилалар, ҳомиладор аёллар ва ёш болалар билан мулоқот қилиш учун катта имкониятларга эга» — деган ЮНИСЕФнинг Ўзбекистондаги ваколатхонаси раҳбари Мунир Мамедзода.
«Патронаж дастурлари индивидуал ёрдамни таъминлашда, муҳтож оилаларга ва жамоаларга тўғридан-тўғри ёрдам кўрсатишда, ота-оналар ва парваришловчиларни қўллаб-қувватлашда, ҳамда уларнинг ёш болалари учун энг яхши шароитларни яратишда ҳал қилувчи ва муҳим аҳамиятга эга»,— деб таъкидлаган у.
«Патронаж хизматининг янги модели нафақат касаллик ва тиббий муаммоларни аниқлашга, балки тиббий-ижтимоий, маърифий ва бошқа соғлиқни сақлаш тадбирлари тўпламини сифатли амалга оширишга ҳам эътиборни қаратади», — деган ҳамширалик иши бўйича бош мутахассис Рихси Солихўжаева.
Хабарда айтилишича, йўриқнома ва китобчаларни ишлаб чиқиш ва нашр этиш универсал-прогрессив патронаж моделини амалга оширишдаги биринчи қадамдир. ЮНИСЕФ Соғлиқни сақлаш вазирлиги билан биргаликда ушбу йўналишдаги ишларни давом эттиришни режалаштирган. Ҳозир патронаж ҳамшираларни янги методикага ўргатадиган тренерлар гуруҳи тайёрланмоқда.
Янги модель ҳамшираларнинг диплом олди ўқиш ва малака ошириш тизимига киритилади. Барча саъй-ҳаракатлар натижасида тиббий ёрдам сифатини яхшилаш, ёрдам ва ғамхўрликка муҳтож оилаларни қўллаб-қувватлашни янада яхшилаш мумкин бўлади.
Аввалроқ ЮНИСЕФ Ўзбекистонга ижтимоий ҳимояни мустаҳкамлаш учун ускуналар совға қилгани ҳақида хабар берилган эди.
Изоҳ (0)