Andijonda koronavirus infeksiyasini tekshirish uchun mo‘ljallangan 34 dona soxta PZR-testni sotishga uringan shaxslar qo‘lga olindi. Bu haqda viloyat IIB axborot xizmati xabar berdi.
Ma’lum qilinishicha, 21-yanvar kuni Andijon tumanida yashovchi S.J. va D.A. ismli shaxslar fuqaro O.D.ga 34 dona COVID-19 infeksiyasini tekshirish uchun mo‘ljallangan soxta PZR-testni jami 1,750 million so‘mga sotayotganida qo‘lga olingan.
Shuningdek, 29-yanvar kuni Xo‘jaobod tumanida yashovchi fuqaro Z.J. noqonuniy ravishda koronavirus infeksiyasini tekshirish uchun mo‘ljallangan 4 dona PZR-testni tegishli analizlar olmasdan, fuqaro S.S.ga 320 ming so‘m evaziga sotayotgan vaqtida ushlangan.
Z.J.dan 320 ming, S.S.dan 4 dona PZR-testi xolislar ishtirokida bayonnoma orqali rasmiylashtirilib, Xo‘jaobod tumani IIB ixtiyoriga olingan. Surishtiruv davomida aniqlanishicha, Z.J. 4 dona noqonuniy ravishda tayyorlangan PZR-testni Jalaquduq tumanida yashovchi fuqaro A.D.dan sotib olgan.
Fuqaro A.D.dan 1 dona Lenovo rusumli kompyuter hamda 1 dona Epson nomli printer daliliy ashyo tariqasida bayonnoma orqali IIB ixtiyoriga olingan.
Mazkur holatlar bo‘yicha Jinoyat kodeksining 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 2-qismi “b” bandi bilan jinoyat ishi qo‘zg‘atilib, hozirda tergov harakatlari olib borilmoqda.
Avvalroq Toshkent xalqaro aeroportida soxta PZR-test ma’lumotnomasini sotayotgan guruh ushlangani haqida xabar berilgandi.
Izoh (0)