Катта Фарғона каналига яна бир фуқаро оқиб кетган бўлиши мумкинлиги юзасидан қидирув ишлари олиб борилмоқда, деб хабар беради «Халқ сўзи online».
Маълум қилинишича, оқиб кетганлиги тахмин қилинаётган фуқаро 1959 йили Андижон шаҳрида туғилган А.К. бўлиб, каналнинг Избоскан туманидан ўтувчи қисмида бахтсиз ҳодиса қурбони бўлган бўлиши мумкин.
Маълумотларга кўра, 4 нафар фарзанднинг отаси бўлган А.К. 2021 йилнинг 28 февраль куни Избоскан туманидаги «Бўстон» МФЙда истиқомат қилувчи қариндошлариникига келган ва шу куннинг ўзида бедарак йўқолган. 1 март куни туман ички ишлар бўлимига йўқолганлиги тўғрисидаги хабар келиб тушган.
Вилоят Фавқулодда вазиятлар бошқармаси матбуот хизматининг хабарига кўра, бедарак йўқолган фуқаро Катта Фарғона каналига чўкиб кетган бўлиши мумкин ва шу боис 1 март кунидан бошлаб 1 та моторли қайиқ, 1 нафар отряд бошлиғи ва 4 нафар ғаввос иштирокида қидирув ишлари олиб борилмоқда.
Шу кунгача каналнинг Избоскан туманининг «Бўстон» МФЙ ҳудудидан ўтувчи қисмидан 5 километр масофагача бўлган ҳудудида қидирув ишлари олиб борилган.
Аввалроқ вилоятнинг Ёзёвон тумани Бўтқачи қишлоғида яшовчи 17 ёшли йигит 2020 йилнинг 22 декабрь куни ўзини Катта Фарғона каналига ташлагани, унинг жасади орадан 73 кун ўтиб топилгани ҳақида хабар берилган эди.
Изоҳ (0)