Farg‘onada fuqaronining 1,8 milliard so‘mini o‘zlashtirgan 70 yoshli shaxsga hukm o‘qildi, deya xabar bermoqda O‘zA.
Ma’lum qilinishicha, 70 yoshli fuqaro E.H. 2012-yilda Beshariq tumani Pastki Yakkatut qishlog‘ida yashovchi D.A. bilan tanishib qoladi. Yangi tanishiga u o‘zining asl ism-sharifini yashirib, Marg‘ilon shahrida yashovchi N.B. ekanligini aytib, Toshkent shahar DXX boshqarmasida polkovnik harbiy unvoni bilan ishlashini ma’lum qiladi.
E.H. tanishgan odamiga gap orasida har qanday xizmatga tayyorligini aytib o‘tadi. Biroz vaqt o‘tib, u D.A.dan 10 ming AQSh dollari berib turishini, o‘n kun ichida qaytarib berishini aytib, ushbu pullarni olgan. Pulni o‘z vaqtida qaytarib, shu orqali uning ishonchiga kirgan. U bu orada D.A.ga bozor-o‘charlar, choyxonada joy aytib, turli ishlar ham buyurib turadi.
D.A. “Bek karate” klubi rahbari va fermer xo‘jaligi boshlig‘i ham edi. Bundan xabar topgan E.H. 2013-yil noyabr oylarida Niderlandiya davlatidan zotdor qora mollar olib kelayotganligini, agar unga ham kerak bo‘lsa, olib kelib berishini aytgan.
Anchadan buyon chorvachilikni yo‘lga qo‘yishni o‘ylab yurgan D.A. bu taklifga ko‘nib, 200 bosh golland zotdor qora moli uchun 1 milliard 800 ming so‘m pullarni uning qo‘liga tutqazdi. Bu pullarni E.H. shaxsiy ehtiyojlari uchun ishlatib yuborgan.
Jinoyat ishlari bo‘yicha Beshariq tuman sudi tomonidan mazkur jinoyat ishi ko‘rib chiqilib, E.H. Jinoyat kodeksi 168-moddasi 3-qismining “a” bandi (ko‘p miqdorda firibgarlik) bilan aybli deb topildi. Uzil-kesil 6 yil 2 oy muddatga ozodlikdan mahrum qilish va 11 million 938 ming 500 so‘m jarima jazosi tayinlandi. Undan jabrlanuvchi D.A. foydasiga 1 milliard 800 ming so‘m moddiy zarar undirish belgilandi.
Aniqlanishicha, 1995-yilda qotillik jinoyati uchun E.H.ga 16 yil muddatga ozodlikdan mahrum qilish jazosi tayinlangan. 2001-yilda o‘talmay qolgan jazosidan amnistiya qaroriga asosan ozod qilingan.
Shuningdek, u o‘tgan davr mobaynida 5 marta firibgarlik jinoyatini sodir etganligi uchun sudlangan.
Bundan avval Termizda 3 ming dollar evaziga ikki kishini harbiy qismga ishga joylashtirib qo‘ymoqchi bo‘lgan shaxs ushlangani, Bo‘stonliqda o‘zganing 15 sotix yerini 33 ming dollarga sotishga uringan shaxslar qo‘lga olingani hamda Farg‘onada fuqaroning 71 200 dollari va 1 milliard so‘mdan ortiq pullarni o‘zlashtirib, xorijga chiqib ketgan shaxsga jinoiy ish ochilgani haqida xabar berilgandi.
Izoh (0)