Фарғонадаги савдо ва хизмат кўрсатиш биноларининг ўзбошимчалик билан қурилган юқори қаватлари бузилиши мумкин, дея хабар берди «Дарё» мухбири Азизжон Эрматов.
Қайд этилишича, вилоят прокуратураси мутахассислар иштирокида олиб борилаётган ўрганишларда жисмоний ва юридик шахслар томонидан 2 та ҳолатда лойиҳа ҳужжатларидан чиқиб, ўзбошимчалик билан тегишли рухсатномасиз қўшимча қаватлар қурилаётганлиги, 3 та ҳолатда қурилиш соҳасидаги ҳудудий назорат инспекциясига хабарнома берилмаган ҳолда рухсатномасиз бино иншоотлар қурилганлиги ва 3 та ҳолатда лойиҳа ҳужжатларидан четга чиқиб икки қаватли савдо ва хизмат кўрсатиш биноси устига мансарда қисми қўшиб қурилганлиги аниқланган.
Жумладан, «Водий омад нури плюс» МЧЖ томонидан Фарғона шаҳар, Сайилгоҳ кўчасида тасдиқланган лойиҳа ҳужжатларига асосан 4 қаватли турар жой биноси қуриш учун рухсатнома олингани ҳолда амалда ўзбошимчалик билан 5 қаватли турар жой биноси қурилиб, шаҳарсозлик қоидалари бузилган.
Фуқаро К.М. томонидан Фарғона шаҳар, Қомус кўчасида 5 қаватли савдо ва хизмат кўрсатиш биноси қуриш учун рухсатнома олиниб, тегишли шаҳарсозлик ҳужжатлари расмийлаштирилмасдан қўшимча 6-қават қурилган.
Шунингдек, фуқаро З.А. томонидан Фарғона шаҳар, Янги аср кўчасида қурилиш назорат инспекциясига хабар берилмаган ҳолда тегишли рухсатномасиз 2 қаватли устида мансарда бўлган савдо ва хизмат кўрсатиш биноси қурилганлиги аниқланган.
Бундан ташқари, «Фарғона Ҳанифа нур» МЧЖ томонидан тўрт қаватли турар жой биноси ҳамда фуқаро Н.Т. томонидан 2 қаватли савдо ва маиший хизмат кўрсатиш биноси қурилишида ҳам рухсатномасиз қурилиш олиб бориш ҳолатини кузатиш мумкин.
Ўрганишлар давомида «Ойбек санаторийси» МЧЖ ва фуқаролар Ф.А. ва А.С. томонидан тегишли ҳужжатлар расмийлаштирилмасдан бино устига мансард қисми қўшиб қурилгани маълум бўлди.
Ушбу қонун бузилиши ҳолатлари юзасидан Фарғона вилоят қурилиш назорат инспекцияси томонидан маъмурий ҳуқуқбузарлик тўғрисидаги ҳужжатлар расмийлаштирилиб, кўриб чиқиш учун судга юборилган. Жисмоний ва юридик шахсларга қурилиш ишларини тўхтатиш ва аниқланган камчиликларни бартараф этиш юзасидан ёзма кўрсатмалар берилган.
Изоҳ (0)