Andijonda giyohvand modda savdosida ishtirok etgan 4 nafar shaxs ushlandi. Ularning 2 nafari — xorij fuqarolari. Bu haqda Tergov departamenti xabar qildi.
Ta’kidlanishicha, 2021-yilning 5-mart kuni soat 18:00 larda viloyat IIB jinoyat qidiruv bo‘limi xodimlari tomonidan tezkor tadbir o‘tkazilgan. Tadbir davomida 36 yoshli E.M. Qirg‘iziston fuqarosi 48 yoshli U.R. bilan Asaka tumani “Kujgan” MFY hududida shartli ravishda mijoz sifatida jalb qilingan fuqaroga 18 000 AQSh dollari evaziga 1830 gramm gashish giyohvandlik moddasini sotgan vaqtida ushlangan.
Qo‘lga olinganlarni Oltinko‘l tumani “Jalabek” MFY hududida joylashgan choyxonada 52 yoshli X.Y. hamda Rossiya fuqarosi 36 yoshli M.M. kutib o‘tirganligi aniqlanib, ularning yoni ko‘zdan kechirilganda, jami 0,78 gramm gashish giyohvandlik moddasi xolislar ishtirokida rasmiylashtirib olingan.
Mazkur holat yuzasidan Asaka tumani IIB huzuridagi tergov bo‘limi tomonidan U.R., E.R., M.M. va X.Y.ga nisbatan Jinoyat kodeksining 273-moddasi 5-qismi (giyohvandlik vositalari, ularning analoglari yoki psixotrop moddalarni ko‘p miqdorda qonunga xilof ravishda sotish) bilan jinoyat ishi qo‘zg‘atilib, protsessual tartibda ushlangan.
Hozirda tergov davom etmoqda.
Ma’lumot uchun, bu turdagi jinoyatlar uchun Jinoyat kodeksining normalariga ko‘ra, 10 yildan 20 yilgacha ozodlikdan mahrum qilish jazosi tayinlanadi.
Bundan avval Rossiya turli jinoyatlarda ayblangan to‘rt nafar shaxsni O‘zbekistonga topshirgani, O‘zbekistonga 1,7 kg giyohvandlik vositalarini oshqozonida olib o‘tmoqchi bo‘lgan shaxslar qo‘lga olingani hamda Toshkent viloyatida giyohvand moddalarining noqonuniy savdosi bilan shug‘ullanuvchi guruh aniqlangani haqida xabar berilgandi.
Izoh (0)