Farg‘ona shahrida ko‘p qavatli turar joylar o‘rtasida barcha qurilishlar to‘xtatilib, poydevor uchun qazilgan kotlovanlar ko‘milishi haqida xabar berilgan edi. 20-fevral kuni viloyat hokimligi matbuot xizmati tomonidan tashkil etilgan brifingda ko‘p qavatli uylar orasida rejalashtirilayotgan uylarning qurilishini to‘xtatish va unga qonuniy baho berishga bir qator omillar sabab bo‘lgani ma’lum qilindi.

Foto: Farg‘ona viloyati hokimligi matbuot xizmati

O‘zAning yozishicha, brifingda viloyat hokimi o‘rinbosari Dilshod Hojiahmedov, Farg‘ona shahar hokimi Mirzohid Ubaydullayev va shahar prokurori Dilmurod Qobulov bu boradagi ishlar haqida axborot berdi.

Farg‘ona shahar hokimi Mirzohid Ubaydullayevning so‘zlariga ko‘ra, shaharsozlik qoidalariga ko‘ra, ko‘p qavatli uylar orasida bolalar uchun maydonchalar va o‘smirlarni sport bilan shug‘ullanishlariga maydonlar, aholini dam olishi va sayr qilishi uchun ko‘kalamzorlashtirilgan hududlar tashkil etilgan bo‘lib, yangi qurilishlar natijasida aynan mana shu inshootlar buzib yuborilgan.

Yangi qurilishlar ko‘p qavatli uylarga xizmat ko‘rsatuvchi muhandislik-kommunikatsiya tarmoqlariga jiddiy zarar yetkazmoqda. Shu sababli ayni kunlarda qurilishlar to‘xtalib, buzib yuborilgan bolalar maydonchalari qayta tiklanmoqda, sog‘lomlashtirish yo‘laklari barpo etilyapti, hududlarda obodonlashtirish va ko‘kalamzorlashtirish ishlari bajarilyapti. Shuningdek, avtoturargohlar, sayr qilish uchun xiyobonlar tashkil qilinmoqda.

“Albatta, mazkur ishlarni amalga oshirishda tadbirkorlarning qonuniy huquq va manfaatlariga zarar yetkazmaslik choralari ko‘rilgan. Qarorlar qabul qilingan, lekin qurilishi boshlanmagan hamda endigina qurilishga kirishgan tadbirkorlarga boshqa hududlardan yer maydonlari taklif etilmoqda”, — degan Mirzohid Ubaydullayev.

Xabarda aytilishicha, Farg‘ona shahrining bosh rejasi va urbanizatsiya dasturiga ko‘ra, Nurafshon ko‘chasidagi Mustaqillik shaharchasi va Aeroport ko‘chasida bunyod etilayotgan mavzeda yangi turar joylar barpo etilmoqda. Shuningdek, Farg‘ona tumanidan shaharga qo‘shilayotgan 300 gektar yer maydoniga Turkiya va Janubiy Koreyaning loyiha institutlari bilan hamkorlikda yo‘ldosh shaharchaning bosh rejasi ishlab chiqilyapti. Tadbirkorlar bu yerda qurilish ishlarini olib borishi mumkin.

Shahar prokuraturasi tomonidan hozirga qadar 20 dan ortiq mahallalarda qurilish ishlari o‘rganib chiqilgan.

Eslatib o‘tamiz, Xayrullo Bozorov Farg‘ona shahridagi “Do‘stlik” hamda “Gulzor” mahallalaridagi aholi yashash sharoitlarini o‘rganish jarayonida hududda ko‘p qavatli turar joylar orasida yashil maydonlar hududidagi daraxtlar kesilgani, bolalar va sport maydonchalari buzilgani va o‘rniga yangi binolar qurilishi boshlanganiga guvoh bo‘lgandi.

Viloyat hokimi birgalikda o‘rganish olib borayotgan shahar hokimi va prokuroriga 13-fevraldan boshlab Farg‘ona shahrida ko‘p qavatli turar joylar o‘rtasida olib borilayotgan barcha qurilishlarni to‘xtatish hamda bunday qurilishlarga ruxsat berish bilan bog‘liq qarorlarni bekor qilish yuzasidan topshiriq bergandi.

Shuningdek, Shavkat Mirziyoyevning Farg‘ona viloyatiga tashrifi chog‘ida Farg‘ona shahar Shodiyona mahallasiga kutilmaganda borib, bu yerda aholi bilan uchrashuvi va mavjud holatning o‘rganganligi hududlarda ko‘plab muammolar borligini ko‘rsatgan. Brifingda ma’lum qilinishicha, bugungi kunda viloyat hokimi boshchiligida har bir mahalla fuqarolar yig‘ini “mahallabay” o‘rganilyapti, aholining turmush sharoitlarini yaxshilash choralari ko‘rilmoqda.

Prezidentning Farg‘ona viloyatiga tashrifi davomida Quva, Yozyovon va O‘zbekiston tumanlari hokimlari, shuningdek, Farg‘ona shahri “to‘rtligi” vazifasidan ozod qilingandi.