Toshkent viloyatining Bo‘stonliq tumanida joylashgan “Amirsoy” tog‘-chang‘i kurorti 12-martgacha yopildi. Bu haqda “Amirsoy”ning Telegram’dagi sahifasida ma’lum qilindi.
Qayd etilishicha, yo‘l qatnov qismida ko‘chkining oldini olish maqsadida kurortga olib boradigan kirish yo‘lida ta’mirlash ishlari olib borilishi ko‘zda tutilgan. Shu sababli Amirsoy Resort’ga olib boruvchi yo‘l FVV va YHXBB tomonidan vaqtinchalik yopiladi.
Kurort ishi 9-martdan 12-martgacha, harakatlanish tiklangunga qadar to‘xtatiladi.
Ayni paytda “Shale” uslubidagi yog‘och uylarda bo‘lib turganlar uchun ushbu uylar va Alpina restorani, shuningdek, kvadratsikllar va snegoxodlar ishlashda davom etadi.
Ma’lumot uchun, “Amirsoy” tog‘-chang‘i kurorti majmuasi 2019-yil 21-dekabr kuni Toshkent viloyati Bo‘stonliq tumanida ochilgan. Kurort loyihasi ikki bosqichda amalga oshiriladi. Birinchi bosqich 2019-yilning IV choragida bitkazilgan, “G‘arbiy Amirsoy” deb nomlangan ikkinchi bosqichi 2022-yilning III choragida bitkazilishi rejalashtirilgan.
Ushbu tog‘-chang‘i kurorti majmuasi hududida tyubing, piyoda sayohatlar, qorda yurish uchun maxsus turlar, chana va kvadratsiklda uchishlarni o‘z ichiga olgan ko‘ngilochar zona va maxsus bolalar o‘yin maydonchasi uchun alohida hududlar tashkil etilgan.
2020-yilning fevralida “Amirsoy” tog‘-chang‘i kurortida qishki sport turlarining tog‘-chang‘i yo‘nalishi bo‘yicha O‘zbekiston chempionati bo‘lib o‘tdi.
Izoh (0)