O‘zbekiston Prezidenti Shavkat Mirziyoyev 9-mart kuni Turkiya tashqi ishlar vaziri Mavlud Chavusho‘g‘li boshchiligidagi delegatsiyani qabul qildi. Bu haqda Prezident matbuot xizmati xabar qildi.
Uchrashuvda O‘zbekiston–Turkiya ko‘p qirrali munosabatlarini rivojlantirishning dolzarb masalalari ko‘rib chiqildi.
Ta’kidlanishicha, davlat rahbari oliy darajadagi muntazam muloqotlar mamlakatlar o‘rtasidagi do‘stlik rishtalari va strategik sheriklikni yanada mustahkamlash, o‘zaro manfaatli hamkorlikni kengaytirish va uni aniq mazmun bilan boyitishga xizmat qilayotganini qayd etdi.
Tashqi ishlar vaziri Mavlud Chavusho‘g‘li samimiy qabul uchun O‘zbekiston Prezidentiga minnatdorlik bildirdi hamda Turkiya Prezidenti Rajab Toyyib Erdo‘g‘onning salomi va samimiy tilaklarini yetkazdi.
Suhbat chog‘ida 2020-yil fevral oyida Anqara shahrida o‘tgan Strategik hamkorlik kengashining davlat rahbarlari darajasidagi birinchi yig‘ilishida erishilgan kelishuvlarni amalga oshirish hamda navbatdagi sammitni O‘zbekistonda o‘tkazishga tayyorgarlik ko‘rish masalalariga alohida e’tibor qaratildi.
Savdo-iqtisodiy sohada hamkorlikni kengaytirish, jumladan, Turkiyaning yetakchi kompaniyalari ishtirokida mamlakatda yangi investitsiya loyihalarini tayyorlash va amalga oshirish muhimligi qayd etildi.
Faol hududlararo muloqotni rivojlantirish, qo‘shma ta’lim va madaniy-gumanitar dasturlarni ilgari surishdan ikkala mamlakat ham manfaatdor ekani ta’kidlandi.
Xalqaro siyosat va mintaqaviy sheriklik, jumladan, Iqtisodiy hamkorlik tashkiloti va Turkiy tilli davlatlar hamkorlik kengashi doirasidagi hamkorlik masalalari yuzasidan fikr almashildi.
Mavzuga doir:
- O‘zbekiston va Turkiya strategik hamkorlik kengashining ikkinchi yig‘ilishiga tayyorgarlik ko‘rmoqda
- Foto: Xiva, Buxoro va Samarqandga tashrif buyurgan Turkiya tashqi ishlar vaziri Mavlud Chovusho‘g‘li
- Samarqandda Turkiyaning bosh konsulxonasi ochildi
- Turkiyaning O‘zbekistondagi yangi elchisi ish boshladi
Izoh (0)