YouTube’dagi “PrivetTachka” kanalida dunyodagi eng noodatiy G-klass — to‘rt eshikli uzaytirilgan kabrioletga bag‘ishlangan video paydo bo‘ldi. Noyob “Gelik” Mercedes-Benz G500 XL Cabrio nomini olgan bo‘lib, 2002-yili Germaniyadagi Baur atelyesida yagona nusxada yig‘ilgan. Hozirda mashina bir nechta yangi Gelandewagen’lardan qimmat turadi.
Loyiha asosini 44 santimetrga uzaytirilgan (5,1 metr) Mercedes-Benz G500 tashkil etadi. Shuningdek, “Gelik” o‘lchami jihatidan Mercedes’ning premium sedanlari kabi tom qismi to‘liq uzaytirilgan va yig‘iladiganga almashtirilgan. “To‘g‘ri, bu mantiqsiz tuyulishi mumkin, axir hech kim to‘rt eshikli kabriolet yasamaydi — kuzov qattiqligi nol bo‘ladi. Ammo loyiha mualliflari ushbu muammoni osonlikcha yechgan: kuzovning yuqori qismiga qo‘shimcha kuchaytirgichlar qotirgan”, — deyiladi xabarda.
Ta’kidlanishicha, dunyodagi eng katta avtomatik yig‘iladigan tom Gelandewagen’ning tomi hisoblanadi. U qo‘shimcha tent seksiyasini qo‘shish orqali oddiy usulda yasalgan. Salonning orqa o‘rindig‘ida o‘tiradiganlar uchun qo‘shimcha keng joy paydo bo‘lgan, shuningdek, ular isitiladigan boshqaruvchi o‘rindiqlar, turli qulaylik opsiyalariga ega alohida konsolga ega. Shuningdek, noodatiy o‘zgartirish sabab orqa o‘rindiqlar oldingilaridan bir pog‘ona yuqoriroq joylashgan.
G500 XL Cabrio 296 ot kuchiga ega 5,0 litrli V8 dvigateli yordamida harakatga keladi. Biroq o‘z o‘lchamlari va og‘irligi sabab mashina soatiga 100 kilometr tezlikka 10 soniyada erishadi, maksimal tezligi esa 190 km/soatdan oshmaydi.
19 yildan buyon 18 ming kilometr yo‘l bosgan “Gelik” narxi oshkor etilmagan. Biroq u bir nechta yangi G-Klass narxida ekanligi aytilmoqda.
Avvalroq Moskvada olti g‘ildirakli “Gelik” qariyb 1 mln dollar qiymatida sotuvga qo‘yilgani to‘g‘risida xabar berilgandi.
Izoh (0)