Toshkentning Olmazor tumanida 7-mart kuni soat 23:40 atrofida shahar jamoat transporti ishtirokida yo‘l-transport hodisasi yuz berdi. Voqea Beruniy—Forobiy ko‘chalari kesishmasida sodir bo‘lgan, deya xabar bermoqda IIV Yo‘l harakati xavfsizligi bosh boshqarmasi (YHXBB).
Ma’lum bo‘lishicha, 1986-yilda tug‘ilgan A.E. o‘z boshqaruvidagi Nexia’ni svetoforning qizil chirog‘ida harakatlantirishi oqibatida yashil chiroqda chorrahaga kirib kelayotgan, 1960-yilda tug‘ilgan I.V. boshqaruvidagi Isuzu avtobusi (8-avtobus saroyiga tegishli) bilan to‘qnashuv sodir etgan.
To‘qnashuv sabab avtobus ag‘darilgan. YHXBBning qayd etishicha, hodisa oqibatida Nexia haydovchisiga va yo‘lovchisi — 29 yoshli N.K.ga birinchi tez tibbiy yordam ko‘rsatilgan. Hodisa yuz bergan vaqtda avtobus salonida yo‘lovchilar bo‘lganmi yoki yo‘q — bunga aniqlik kiritilmagan.
“Mazkur YTH yuzasidan Toshkent shahar IIBB YHXB tomonidan surishtiruv harakatlari olib borilmoqda”, — deyiladi IIV YHXBB axborotida.
Izoh (0)