Видео: Ягона нусхада яратилган тўрт эшикли узайтирилган Gelandewagen кабриолети

YouTube’даги «ПриветТачка» каналида дунёдаги энг ноодатий G-класс — тўрт эшикли узайтирилган кабриолетга бағишланган видео пайдо бўлди. Ноёб «Гелик» Mercedes-Benz G500 ХL Cabrio номини олган бўлиб, 2002 йили Германиядаги Баур ательесида ягона нусхада йиғилган. Ҳозирда машина бир нечта янги Gelandewagen’лардан қиммат туради.

Лойиҳа асосини 44 сантиметрга узайтирилган (5,1 метр) Mercedes-Benz G500 ташкил этади. Шунингдек, «Гелик» ўлчами жиҳатидан Mercedes’нинг премиум седанлари каби том қисми тўлиқ узайтирилган ва йиғиладиганга алмаштирилган. «Тўғри, бу мантиқсиз туюлиши мумкин, ахир ҳеч ким тўрт эшикли кабриолет ясамайди — кузов қаттиқлиги нол бўлади. Аммо лойиҳа муаллифлари ушбу муаммони осонликча ечган: кузовнинг юқори қисмига қўшимча кучайтиргичлар қотирган», — дейилади хабарда.

Таъкидланишича, дунёдаги энг катта автоматик йиғиладиган том Gelandewagen’нинг томи ҳисобланади. У қўшимча тент секциясини қўшиш орқали оддий усулда ясалган. Салоннинг орқа ўриндиғида ўтирадиганлар учун қўшимча кенг жой пайдо бўлган, шунингдек, улар иситиладиган бошқарувчи ўриндиқлар, турли қулайлик опсияларига эга алоҳида консолга эга. Шунингдек, ноодатий ўзгартириш сабаб орқа ўриндиқлар олдингиларидан бир поғона юқорироқ жойлашган.

G500 ХL Cabrio 296 от кучига эга 5,0 литрли В8 двигатели ёрдамида ҳаракатга келади. Бироқ ўз ўлчамлари ва оғирлиги сабаб машина соатига 100 километр тезликка 10 сонияда эришади, максимал тезлиги эса 190 км/соатдан ошмайди.

19 йилдан буён 18 минг километр йўл босган «Гелик» нархи ошкор этилмаган. Бироқ у бир нечта янги G-Класс нархида эканлиги айтилмоқда.

Аввалроқ Москвада олти ғилдиракли «Гелик» қарийб 1 млн доллар қийматида сотувга қўйилгани тўғрисида хабар берилганди.