Andijon viloyati hokimi Shuhratbek Abdurahmonov Marhamat tumanida hunarmand, shuningdek, “ayollar daftari”ga kiritilgan xotin-qizlar bilan uchrashdi, deb xabar bermoqda O‘zA.
Ma’lum qilinishicha, viloyat hokimi muloqotda tadbir qatnashchilarini Xalqaro xotin-qizlar bayrami bilan tabriklab, mamlakatda Prezident tashabbusi bilan aholining turmush sharoitini yaxshilash, ularni qiynayotgan muammolarni hal etish, xotin-qizlarni tadbirkorlikka jalb etish orqali daromadlarini oshirish masalalariga alohida e’tibor qaratilayotganligini ta’kidlagan.
Ayni paytda Marhamat tumanida 175 ming nafardan ziyod aholi istiqomat qiladi. Aholining yarmidan ortig‘i xotin-qizlardir. Muloqotda aholi, xususan, xotin-qizlar bandligini ta’minlash borasida keng ko‘lamli ishlar olib borilayotgan bo‘lsa-da, lekin bu borada tumanda hali qator muammolar mavjudligi qayd etilgan.
Xabarda aytilishicha, Marhamat tumanining aksariyat mahallalarida jundan ro‘mol to‘qish hunari ancha rivojlangan bo‘lib, ro‘mol to‘qish bo‘yicha tumanda o‘ziga xos tajriba maktabi yaratilgan. Shundan kelib chiqib, viloyat hokimi ayollarning bandligini ta’minlash, ularning doimiy daromad manbaini shakllantirishda shu yo‘nalishdagi ishlar ko‘lamini kengaytirish, mavjud imkoniyatlardan samarali foydalanish yuzasidan taklif, fikr va mulohazalar bildirgan.
Uchrashuvda Shuhratbek Abdurahmonov ro‘mol to‘qish yo‘nalishida o‘z tadbirkorligini boshlash va kengaytirish arafasida turgan 75 nafar xotin-qizga AT “Xalq banki” Marhamat tuman filiali tomonidan ajratilgan kredit mablag‘lari hisobidan 5 million so‘mdan naqd pul topshirgan.
Muloqotda mutaxassislar tomonidan tumanda kredit olish istagidagi hunarmand xotin-qizlarga imtiyozli kreditlar ajratilishi ta’kidlanib, mazkur mablag‘lar bosqichma-bosqich berilishi, uni maqsadli sarflash va qaytarish yuzasidan tushunchalar berilgan.
Avvalroq Shavkat Mirziyoyev 8-mart – Xalqaro xotin-qizlar kuni munosabati bilan bir guruh ayollarni yuksak unvon, orden va medallar bilan mukofotlagani, Prezident qarori bilan yigirma sakkiz nafar faol qiz Zulfiya nomidagi Davlat mukofoti bilan taqdirlangani haqida xabar berilgan edi. Davlat rahbari Tashkent City Kongress-xollda ushbu mukofotlarni tantanali ravishda egalariga topshirdi.
Izoh (0)