Андижон вилояти ҳокими Шуҳратбек Абдураҳмонов Марҳамат туманида ҳунарманд, шунингдек, «аёллар дафтари»га киритилган хотин-қизлар билан учрашди, деб хабар бермоқда ЎзА.
Маълум қилинишича, вилоят ҳокими мулоқотда тадбир қатнашчиларини Халқаро хотин-қизлар байрами билан табриклаб, мамлакатда Президент ташаббуси билан аҳолининг турмуш шароитини яхшилаш, уларни қийнаётган муаммоларни ҳал этиш, хотин-қизларни тадбиркорликка жалб этиш орқали даромадларини ошириш масалаларига алоҳида эътибор қаратилаётганлигини таъкидлаган.
Айни пайтда Марҳамат туманида 175 минг нафардан зиёд аҳоли истиқомат қилади. Аҳолининг ярмидан ортиғи хотин-қизлардир. Мулоқотда аҳоли, хусусан, хотин-қизлар бандлигини таъминлаш борасида кенг кўламли ишлар олиб борилаётган бўлса-да, лекин бу борада туманда ҳали қатор муаммолар мавжудлиги қайд этилган.
Хабарда айтилишича, Марҳамат туманининг аксарият маҳаллаларида жундан рўмол тўқиш ҳунари анча ривожланган бўлиб, рўмол тўқиш бўйича туманда ўзига хос тажриба мактаби яратилган. Шундан келиб чиқиб, вилоят ҳокими аёлларнинг бандлигини таъминлаш, уларнинг доимий даромад манбаини шакллантиришда шу йўналишдаги ишлар кўламини кенгайтириш, мавжуд имкониятлардан самарали фойдаланиш юзасидан таклиф, фикр ва мулоҳазалар билдирган.
Учрашувда Шуҳратбек Абдураҳмонов рўмол тўқиш йўналишида ўз тадбиркорлигини бошлаш ва кенгайтириш арафасида турган 75 нафар хотин-қизга АТ «Халқ банки» Марҳамат туман филиали томонидан ажратилган кредит маблағлари ҳисобидан 5 миллион сўмдан нақд пул топширган.
Мулоқотда мутахассислар томонидан туманда кредит олиш истагидаги ҳунарманд хотин-қизларга имтиёзли кредитлар ажратилиши таъкидланиб, мазкур маблағлар босқичма-босқич берилиши, уни мақсадли сарфлаш ва қайтариш юзасидан тушунчалар берилган.
Аввалроқ Шавкат Мирзиёев 8 март – Халқаро хотин-қизлар куни муносабати билан бир гуруҳ аёлларни юксак унвон, орден ва медаллар билан мукофотлагани, Президент қарори билан йигирма саккиз нафар фаол қиз Зулфия номидаги Давлат мукофоти билан тақдирлангани ҳақида хабар берилган эди. Давлат раҳбари Tashkent City Конгресс-холлда ушбу мукофотларни тантанали равишда эгаларига топширди.
Изоҳ (0)