Maktabgacha ta’lim vazirligi qashqadaryolik tadbirkor Vahob Norsafarovning davlat-xususiy sheriklik asosida tashkil etilgan bog‘chasining yopilish ehtimoli haqidagi maqolaga munosabat bildirib, tadbirkorning takroriy murojaatlari xalq va tadbirkorlar o‘rtasida norozilik kayfiyatini uyg‘otish sabab bo‘layotganini bildirdi.
Vazirlik axborot xizmati rahbari Mavluda Asqarxo‘jayeva tomonidan taqdim etilgan munosabatda “Real kelajak” nodavlat ta’lim muassasasi bilan imzolangan bitim Vazirlar Mahkamasining 2018-yil 22-noyabrdagi “Maktabgacha ta’lim sohasida davlat-xususiy sheriklik shakllarini yanada kengaytirish chora-tadbirlari to‘g‘risida”gi 944-sonli qarori bilan tasdiqlangan nizomga ko‘ra tuzilgani, bu shaklda tuzilgan bitimlarda esa tashkilot ishchi xodimlarining ish haqlari davlat budjeti hisobidan qoplanishi ko‘zda tutilmagani ta’kidlangan.
“Ushbu bitimga asosan loyiha qiymati 2 milliard 700 million so‘mni tashkil etib, shundan 2 milliard so‘mi vazirlik tomonidan yo‘naltirilgan imtiyozli kredit mablag‘i va 700 million so‘mi tashabbuskor mablag‘i hisobidan amalga oshirilishi belgilangan. Mazkur bitimda tomonlarning huquqlari va majburiyatlari keltirilgan bo‘lib, Maktabgacha ta’lim vazirligi tomonidan olingan majburiyatlar to‘liq bajarilgan. Xususan, 2019-yil 5-avgustda ajratilgan resurs mablag‘lari hisobidan 2 milliard so‘m imtiyozli kredit mablag‘lari tadbirkorga to‘liq ajratib berilgan. Tadbirkor tomonidan ajratilgan imtiyozli kredit mablag‘i va o‘z mablag‘i hisobidan rekonstruksiya ishlari 2019-yil 25-sentabrda tugatilgan hamda 7-oktabrda davlat qabul komissiyasi dalolatnomasi rasmiylashtirilgan. Hozirgi kunda ushbu nodavlat maktabgacha ta’lim tashkiloti o‘z faoliyatini yuritib kelmoqda”, — deyiladi vazirlik axborotida.
Vazirlikka ko‘ra, tashkilot muassisi Vahob Norsafarov o‘ziga berilgan yordamlarni tilga olmay, subsidiya ajratilishini so‘rab, Prezidentga, Maktabgacha ta’lim vazirligiga, O‘zbekiston Respublikasi Prezidenti huzuridagi tadbirkorlik subyektlarining huquqlari va qonuniy manfaatlarini himoya qilish bo‘yicha vakili ombudsmanga takroriy murojaatlar qilgan. Shuningdek, viloyatda tashkil etilgan sayyor qabullarda hamda ijtimoiy tarmoqlarda ham “Real kelajak” NTMga pedagog ishchi xodimlari ish haqiga sarflanadigan xarajatlarni qoplash uchun respublika budjetidan subsidiyalar ajratish masalasida takroriy videochiqishlar qilgan.
“Ta’kidlash lozimki, ushbu nizomga ko‘ra ‘Real kelajak’ NTM quyidagi imtiyozlardan foydalanib kelmoqda, — deya vazirlik tadbirkorga ko‘rsatilayotgan yordamlarni birin-ketin sanaydi. — Birinchidan, 15 yil muddatga 3 yillik imtiyozli davr bilan 1 foizlik stavkada 2 milliard so‘m miqdoridagi kredit mablag‘i berilgan. Ikkinchidan, nodavlat maktabgacha ta’lim tashkilotlari xarajatlarining bir qismini qoplash uchun davlat maktabgacha ta’lim tashkilotining bir nafar tarbiyalanuvchisiga sarflanadigan summaning 50 foiziga qadar miqdorda davlat budjetidan subsidiyalar ajratib kelinmoqda. Uchinchidan, NMTT o‘z faoliyatini amalga oshira boshlagandan keyin o‘n yil mobaynida barcha turdagi soliqlar va davlat maqsadli jamg‘armalariga majburiy ajratmalar to‘lashdan ozod qilingan. To‘rtinchidan, davlat-xususiy sheriklik to‘g‘risidagi bitim imzolangan oydan boshlab o‘n yil muddatga yagona ijtimoiy to‘lov stavkasi 5 foiz miqdorida to‘lov amalga oshirib kelinmoqda”.
Vazirlik axborot xizmatining tushuntirishicha, Prezidentning 2018-yil 5-apreldagi qarorining 97-bandi oxirgi xatboshisida “maktabgacha ta’lim muassasasining rahbarlari, metodistlari, tarbiyachilari, defektologlari, psixologlari, musiqa xodimlari ish haqiga sarflanadigan xarajatlarni qoplash uchun davlat maktabgacha ta’lim muassasalari uchun belgilangan shartlarda qo‘shimcha budjet subsidiyalarini olish huquqiga ega” ekanligi ko‘rsatib o‘tilgan. Ushbu band qarorda sanab o‘tilgan davlat-xususiy sheriklikning 9 ta shaklidan biri, ya’ni 12-bobda keltirilgan shakliga tegishli bo‘lib, bunda xususiy sherik mulki negizida tashkil etilgan nodavlat maktabgacha ta’lim muassasalarini moddiy ta’minlash shaklidagi davlat-xususiy sheriklikni amalga oshirish tartibi va imtiyozlari belgilangan. Ushbu bobda keltirilgan imtiyoz, maktabgacha ta’lim sohasidagi davlat-xususiy sheriklikning boshqa shakllariga tatbiq etilmasligi ko‘rsatib o‘tilgan.
“‘Real kelajak’ NTM tomonidan tashkil etilgan nodavlat maktabgacha ta’lim tashkiloti moddiy ta’minlash shaklida emas, balki eski mehmonxona binosini vazirlik tomonidan yo‘naltirilgan imtiyozli kredit hisobidan rekonstruksiya qilib, jihozlash orqali yuqoridagi 944-sonli qaror asosida tashkil etilgan. NTM boshqaruvchisi Vahob Norsafarovning shu mazmundagi avvalgi murojaatlariga vazirlik tomonidan 2019-yil 2-oktabrda, 30-oktabrda, 2020-yil 22-aprelda, 2-iyunda hamda O‘zbekiston Respublikasi Prezidenti huzuridagi tadbirkorlik subyektlarining huquqlari va qonuniy manfaatlarini himoya qilish bo‘yicha vakili D.Qosimovning 2020-yil 14-maydagi javob xatlari orqali tushuntirishlar berilgan”, — deydi vazirlik axborot xizmati mas’ullari.
Vazirlik tomonidan qo‘shimcha qilinishicha, tadbirkor talab qilgandek amaldagi ushbu qarorlarga tegishli o‘zgartirish kiritilishi maktabgacha ta’lim sohasida joriy etilgan davlat-xususiy sheriklik shakllarining mazmuni va mohiyati keskin o‘zgarishiga olib keladi hamda davlat budjetidan qo‘shimcha sarf-xarajatlarni talab etadi. Shu sabab vazirlik tadbirkorning talabini maqsadga muvofiq emas, deb topgan.
Maktabgacha ta’lim vazirligining ta’kidlashicha, tadbirkor Vahob Norsafarovning takroriy videomurojaatlarida davlat tomonidan “Real kelajak” NTMga taqdim etilgan imtiyozlarga to‘xtalib o‘tilmay, hukumat va vazirlik rahbarlariga nisbatan asossiz va noo‘rin fikrlar bildirib kelinmoqda. Bu orqali tadbirkor ikki tomonlama imzolangan bitimda belgilangan majburiyatlarini bajarmaslikni maqsad qilgan.
“Fuqaro Vahob Norsafarov tomonidan maktabgacha ta’lim sohasida olib borilayotgan islohotlarni hamda hukumatimiz tomonidan tadbirkorlarga yaratilgan imtiyoz va imkoniyatlarni noto‘g‘ri talqin qilib kelayotganligi, xalqimiz va tadbirkorlar o‘rtasida norozilik kayfiyatini uyg‘otishga o‘z ta’sirini ko‘rsatmoqda”, — deyiladi vazirlik munosabatida.
Izoh (0)