Toshkent shahri Sergeli tumanida imtiyozli narxlarda turar joy xonadonlarini olib berish evaziga 9 ming dollarni qo‘lga kiritgan shaxsga nisbatan jinoyat ishi qo‘zg‘atildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ma’lum qilinishicha, Bosh prokuratura huzuridagi departamentning Mirobod tuman bo‘limi tomonidan tezkor tadbir o‘tkazilgan. Tadbir davomida fuqaro A.G. fuqaro N.N.ga o‘zini Sergeli tumanidagi mahallalardan birining raisi sifatida tanishtirib, yuqori lavozimda ishlovchi tanishlari orqali tumandagi kam ta’minlanganlar uchun qurilgan ko‘p qavatli uylardan 3 ta xonadonni imtiyozli narxlarda olib berishni va’da qilgan. U o‘z xizmati evaziga 9000 AQSh dollarini firibgarlik yo‘li bilan qo‘lga kiritganligi aniqlangan.
Mazkur holat yuzasidan A.G.ga nisbatan Jinoyat kodeksining 168-moddasi (firibgarlik) va 28-, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqandda bir xonali kvartira ajratish uchun 4 ming AQSh dollari talab qilgan firibgar qo‘lga tushgani, Buxoroda 1000 dollar evaziga navbatsiz kvartira olib bermoqchi bo‘lgan shaxs ushlangani to‘g‘risida xabar berilgandi.
Izoh (0)