Ўзини маҳалла раиси сифатида таништириб, Сергелидан имтиёзли нархларда уй олиб беришни ваъда қилган шахсга жиноят иши қўзғатилди

Тошкент шаҳри Сергели туманида имтиёзли нархларда турар жой хонадонларини олиб бериш эвазига 9 минг долларни қўлга киритган шахсга нисбатан жиноят иши қўзғатилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум қилинишича, Бош прокуратура ҳузуридаги департаментнинг Миробод туман бўлими томонидан тезкор тадбир ўтказилган. Тадбир давомида фуқаро А.Г. фуқаро Н.Н.га ўзини Сергели туманидаги маҳаллалардан бирининг раиси сифатида таништириб, юқори лавозимда ишловчи танишлари орқали тумандаги кам таъминланганлар учун қурилган кўп қаватли уйлардан 3 та хонадонни имтиёзли нархларда олиб беришни ваъда қилган. У ўз хизмати эвазига 9000 АҚШ долларини фирибгарлик йўли билан қўлга киритганлиги аниқланган.

Мазкур ҳолат юзасидан А.Г.га нисбатан Жиноят кодексининг 168-моддаси (фирибгарлик) ва 28-, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Аввалроқ Самарқандда бир хонали квартира ажратиш учун 4 минг АҚШ доллари талаб қилган фирибгар қўлга тушгани, Бухорода 1000 доллар эвазига навбатсиз квартира олиб бермоқчи бўлган шахс ушлангани тўғрисида хабар берилганди.